ৰহা, 25 জানুৱাৰী : নগাঁৱৰ ৰহাত সংঘটিত হ'ল এক অমানুষিক ঘটনা ৷ ৰহাৰ সৰিয়হতলী মিলনপুৰ গাঁৱত এক পাৰিবাৰিক ঘটনাৰ তদন্তত যোৱা আৰক্ষীক একাংশ উদণ্ড লোকে আক্ৰমণ কৰা ঘটনাই তীব্ৰ চাঞ্চল্যৰ সৃষ্টি কৰিছে ৷ এগৰাকী আৰক্ষী বিষয়াক গছত বান্ধি অত্যাচাৰ চলালে এদল উন্মত্ত ৰাইজে ৷ ঘটনাৰ ফলত আৰক্ষী বিষয়াগৰাকী গুৰুতৰভাৱে আহত হোৱাত এখন ব্যক্তিগত চিকিৎসালয়ত চিকিৎসাধীন কৰা হৈছে ৷
ঘটনাৰ বিৱৰণী অনুসৰি, মিলনপুৰ গাঁৱৰ হিৰকজ্যোতি নাথ নামৰ যুৱকজনে মাগুৰগাঁৱৰ কৃষ্ণ নাথৰ কন্যা মৌচুমী দেৱীক বিয়া কৰোৱাৰে পৰা মাতৃ ৰীণা দেৱীৰ সৈতে লগ হৈ শাৰীৰিক আৰু মানসিক অত্যাচাৰ চলাই আহিছিল । উপায়ন্তৰ হৈ মৌচুমীৰ পিতৃ কৃষ্ণ নাথে চাপৰমুখ আৰক্ষী চকীত দাখিল কৰিছিল এজাহাৰ । তাৰ ভিত্তিতে শুকুৰবাৰে চাপৰমুখ আৰক্ষী চকীৰ ভাৰপ্ৰাপ্ত বিষয়া প্ৰফুল্ল বৰাই দুজন কনিষ্টবলক লগত লৈ হীৰকজ্যোতিৰ ঘৰত উপস্থিত হৈছিল । কিন্তু একাংশ পুৰুষ-মহিলাই আৰক্ষী বিষয়া প্ৰফুল্ল বৰাই মদ্যপান কৰি মহিলাৰ ওপৰত হাত দিয়াৰ অভিযোগ তুলি হাতে-ভৰিৰে বান্ধি প্ৰহাৰ কৰাৰ লগতে একাংশই আৰক্ষী বিষয়াগৰাকীৰ চুলি কাটি দিয়ে ৷
উন্মত্ত লোকসকলে লগত যোৱা কনিষ্টবল দুজনকো আক্ৰমণ কৰে । পাচত ৰহা থানাৰ আন এটা দল উপস্থিত হৈ গুৰুতৰভাৱে আহত প্ৰফুল্ল বৰাক উদ্ধাৰ কৰাৰ লগতে নগাঁও অসামৰিক চিকিৎসালয়ত ভৰ্তি কৰায় ৷ পাচত তেওঁক উন্নত চিকিৎসাৰ বাবে নগাঁৱৰ এখন ব্যক্তিগত চিকিৎসালয়ত ভৰ্তি কৰোৱা হয় ৷ প্ৰত্যক্ষদৰ্শীয়ে জানিবলৈ দিয়া অনুসৰি, হিৰকজ্যোতি আৰু তেওঁৰ পৰিয়ালৰ লোকেও আৰক্ষী বিষয়াগৰাকীক আক্ৰমণ কৰে ৷
