নগাঁও, 9 আগষ্টঃ ফেচবুকত সত্য উন্মোচন কৰি দল এৰিবলগীয়া হ'ল এজন বিজেপি কৰ্মীয়ে । বিজেপি কৰ্মীজনৰ পুখুৰীক ৰাজহুৱা পুখুৰী বুলি মুখ্যমন্ত্ৰীক দেখুৱাই বাঃ বাঃ লোৱাৰ অভিযোগ বিধায়িকা আঙুৰলতা ডেকাৰ বিৰুদ্ধে। অভিযোগ ঢাকিবলৈ বিধায়িকা আঙুৰলতা ডেকাই আয়োজন কৰিলে সংবাদ মেল ।
উল্লেখ্য যে, ৬ আগষ্টত নগাঁও জিলাত কেইবাটাও কাৰ্য্যসূচী লৈ বটদ্ৰৱাত উপস্থিত হৈছিল মুখ্যমন্ত্ৰী সৰ্বানন্দ সোণোৱাল ৷ উপস্থিত হৈ সোণোৱালে পৰিদৰ্শন কৰে চৰকাৰৰ 'ঘৰে ঘৰে পুখুৰী ঘৰে ঘৰে মাছ' আঁচনিৰ পুখুৰী । আনহাতে বিধায়িকা আঙুৰলতা ডেকাই আত্মসহায়ক গোটৰ পুখুৰী বুলি দেখুৱালে এজন যুৱকে লীজত লৈ ব্যক্তিগতভাৱে মৎস্য পালন কৰা আন এটা পুখুৰীহে ৷ ইফালে মুখ্যমন্ত্ৰীয়েও বিধায়িকাগৰাকীকো দিলে বাঃ বাঃ ৷
কিন্তু এটা ফেচবুকৰ পোষ্টৰ জৰিয়তে ওলাই পৰিল জোলোঙাৰ মেকুৰী ৷ ঘটনা অনুসৰি মুখ্যমন্ত্ৰীক দেখুওৱা পুখুৰীটো আছিল বিজেপি দলৰে এজন দলীয় কৰ্মী ৰাহুল মেধিৰ ৷ মেধিয়ে 3 বছৰলৈ লীজত লৈছিল পুখুৰীটো । ইতিমধ্যে পুখুৰীতো 2 বছৰ 2 মাহ অতিক্ৰমো কৰিছে ম্যাদ শেষ হ'বলৈ বাকী আছে 10 মাহ ৷ ইফালে বিধায়িকাগৰাকীৰ এনে কাণ্ডত স্বাভাৱিকতে ক্ষুব্ধ হৈ পৰে বিজেপি কৰ্মী ৰাহুল মেধি । ফেচবুকৰ জৰিয়তে দিলে সমগ্ৰ ঘটনাৰ বিৱৰণ ।
কেৱল চমক সৃষ্টিৰ ৰাজনীতিত সিদ্ধহস্ত বিধায়িকা আঙুৰলতা ডেকাই এতিয়া নিজৰ নাক বচাবলৈ তৎকালীনভাৱে আয়োজন কৰিলে সংবাদ মেল । মীন বিভাগৰ বিষয়াক লগত লৈ সংবাদ মেলৰ আয়োজন কৰি স্পষ্টীকৰণ দিয়াৰ চেষ্টা কৰাৰ লগতে বিজেপি কৰ্মী ৰাহুল মেধিক অপসাৰণ কৰাৰ কথাও উল্লেখ কৰে । ফেচবুকত বিধায়িকা গৰাকীৰ ক্ৰেডিট লোৱা ৰাজনীতি উন্মোচন কৰি বাঃ বাঃ লোৱা ঘটনাটোৰ পিছতেই অৱশেষত বিজেপি দল এৰিবলৈ বাধ্য হ'ল ৰাহুক মেধি ।
ক্ৰমান্বয়ে বটদ্ৰৱাত জনসমৰ্থন হেৰুওৱা বিধায়িকা আঙুৰলতা ডেকাৰ বিৰুদ্ধে যে এতিয়া সমষ্টিটোৰ বহু বিজেপি কৰ্মীও ক্ষুণ্ণ হৈছে সেই কথাই স্পষ্ট হৈছে খোদ বিজেপি কৰ্মীয়ে দিয়া ফেচবুক পষ্টটোতেই ধৰা পৰিছে ।
লগতে পঢ়ক- বিধায়ক শিলাদিত্য দেৱৰ বিৰুদ্ধে জালুকবাৰী আৰক্ষী চকীত এজাহাৰ
