চামগুৰি , 16 আগষ্ট : ৰাজ্যত পুনৰ পোহৰলৈ আহিছে বন কৰা শিশু নিৰ্যাতনৰ ঘটনা ৷ নগাঁৱৰ পুৰণিগুদামৰ কাষৰিগাঁৱত উদ্ধাৰ হৈছে ভুক্তভোগী বন কৰা শিশুটি । চামগুৰি আৰক্ষীয়ে কাষৰিগাঁৱৰ প্ৰভাত বৰাৰ ঘৰৰ পৰা উদ্ধাৰ কৰা হয় কণমানিজনীৰ । প্ৰভাত বৰাৰ পৰিয়ালৰ লোকে বনকৰা শিশুটোক অকথ্য নিৰ্যাতন চলোৱাৰ গুৰুতৰ অভিযোগ উত্থাপন কৰিছে স্থানীয় ৰাইজে ।
প্ৰতিদিনে প্ৰভাত বৰাৰ পৰিয়ালৰ লোকে শিশুটিক শাৰীৰিক নিৰ্যাতন চলাই অহা বাবে চামগুৰি আৰক্ষীক ঘটনাৰ বিষয়ে অৱগত কৰিছিল স্থানীয় ৰাইজে । শিশুটিক চলোৱা অকথ্য নিৰ্যাতনৰ দৃশ্য বন্দী হৈছে কেমেৰাত । স্থানীয় ৰাইজৰ অভিযোগৰ ভিত্তিত শিশুটি উদ্ধাৰ কৰি আৰক্ষীয়ে অব্যাহত ৰাখিছে অনুসন্ধান ।
উল্লেখ্য যে, শিশু শ্ৰম আইন কঠোৰভাৱে প্ৰয়োগ কৰিবলৈ চৰকাৰ তৎপৰ হৈ থকাৰ মাজতে এচাম দুষ্ট লোকে দৰিদ্ৰতাৰ সুযোগ লৈ নিজৰ কামত ব্যৱহাৰ কৰিছে বশিশুক ৷ আৰক্ষী তথা প্ৰশাসনৰ চকুত ধূলি দি এইদৰে বহুক্ষেত্ৰত নিয়োজিত হৈ আছে কণ কণ শিশু ৷
বহু সময়ত শিশু শ্ৰমিক ব্যৱহাৰৰ ঘটনা পোহৰলৈ আহে যদিও বেছি সংখ্যক ঘটনাই পোহৰলৈ নাহে ৷ যাৰ বাবে একাংশ বিত্তবান তথা ধনবল, বাহুবলেৰে বলীয়ান লোকে চৰকাৰ তথা আইনৰ সকলো নিৰ্দেশক অৱমাননা কৰি নিজৰ কামত ব্যৱহাৰ কৰি আহিছে শিশু শ্ৰমিকসকলক ৷
উল্লেখনীয়ভাৱে শিশু আইন অনুসৰি ১৪ বছৰ তলৰ শিশুক কাম কৰোৱাটো আইনমতে দণ্ডনীয় । কিন্তু এতিয়াও একাংশ হোটেল, ধাবা আৰু ৰেষ্টুৰেণ্টৰ স্বত্বাধিকাৰীয়ে এই আইন উলংঘা কৰি পইচাৰ প্ৰলোভনেৰে শিশুসকলক কামত নিয়োজিত কৰা পৰিলক্ষিত হয় ৷ শিশু শ্ৰমিক আইন ভংগ কৰা এনে লোকসকলৰ ওপৰত চৰকাৰে কি ব্যৱস্থা গ্ৰহণ কৰে সেয়া পৰৱৰ্তী সময়তহে লক্ষণীয় হ’ব ।
লগতে পঢ়ক:ৰঙাপৰাত উত্তপ্ত পৰিস্থিতি :পৰিস্থিতি নিয়ন্ত্ৰণ কৰিবলৈ আৰক্ষীৰ শূণ্যলৈ গুলি
