বটদ্ৰৱা, 21 এপ্ৰিল: নগাঁও জিলাৰ বটদ্ৰৱা ৰাইদঙীয়াৰ খলিহামাৰিস্থিত চৰকাৰী ভূমিত আৰক্ষী প্ৰশাসনৰ নিৰ্লিপ্ততাৰ সুযোগ গ্ৰহণ কৰি এক দুষ্ট চক্ৰই চলাইছে অবৈধ খননকাৰ্য ৷ মহাপুৰুষ শ্ৰীমন্ত শঙ্কৰদেৱৰ সৃষ্টিৰাজিক বিশ্বৰ দৰবাৰত জিলিকাই তোলাৰ প্ৰয়াসেৰে নিৰ্মাণ কাৰ্য্য চলি থকা শ্ৰীমন্ত শঙ্কৰদেৱ বিশ্ববিদ্যালয়ৰ নিচেই কাষতেই দুষ্টচক্ৰটোৱে বিগত 15/20 দিন ধৰি খনন কাৰ্য চলাই আহিছে ৷ কোনোধৰণৰ অনুমতি অবিহনে নম্বৰ প্লেটবিহীন জেছিবি আৰু অত্যাধুনিক যন্ত্ৰৰ ব্যৱহাৰেৰে খনন কাৰ্য চলাই সৃষ্টি কৰিছে এক বৃহৎ পুখুৰীৰ ৷
এই কাৰ্যত এতিয়া জাঙুৰ খাই উঠিছে বটদ্ৰৱা থান পৰিচালনা সমিতিৰ লগতে বিভিন্ন দল সংগঠন । অভিযোগ অনুসৰি চৰকাৰী ভূমিত এনেদৰে খনন চলোৱাত মহান অনুষ্ঠানতো এতিয়া সংকটৰ দিশে গতি কৰাৰ লগতে আৰক্ষী প্ৰশাসনে বৃহৎ ধনৰ বিনিময়ত দুষ্ট চক্ৰটোক খননৰ অনুমতি প্ৰদান কৰিছে ৷ স্থানীয় দল সংগঠনে এই কাৰ্যত বাধা প্ৰদান কৰাত এজন গাড়ী চালকে জানিবলৈ দিয়ে যে, কোনো এটা চৰকাৰী বিভাগৰ অভিযন্তাই উক্ত খনন কাৰ্য চলাবলৈ অনুমতি প্ৰদান কৰিছে ৷
