টীয়ক, ৫ মে': টীয়কত ৰাষ্ট্ৰীয় ঘাইপথ সম্প্ৰসাৰণৰ ক্ৰুটিপুৰ্ণ কামে জীয়াতু ভোগাইছে অঞ্চলটোৰ আৱাসীসকলক । শনিবাৰে অসমৰ মুখ্যমন্ত্ৰী সৰ্বানন্দ সোনোৱালে চাৰিলেণ্ডযুক্ত পথ সম্প্ৰসাৰণৰ কাৰ্যৰ পৰ্যবেক্ষণ কৰি অগ্ৰগতি নোহোৱাত অসন্তুষ্টি প্ৰকাশ কৰে । ইয়াৰ পাছতে মুখ্যমন্ত্ৰী গৰাকীয়ে অতি ক্ষিপ্ৰতাৰে নিৰ্দ্ধাৰিত সময়ৰ ভিতৰত কাম সম্পূৰ্ণ কৰিবলৈ দায়িত্ব অৰ্পন কৰে কোম্পানীক । ৰাইজে অভিযোগ কৰা মতে, চাৰিলেণ্ডযুক্ত পথৰ কাষৰ নলা - নৰ্দমাসমূহ বিজ্ঞানসন্মত নোহোৱাৰ ফলত নলাবোৰেদি পানী যোৱাৰ পৰিৱৰ্তে আৱাসীৰ ঘৰ - বাৰীত সুমাইছে ।
নলাসমূহ নিৰ্মাণ কৰা সময়ৰ পৰাই সচেতন ৰাইজে উৰ্ধতন কৰ্তৃপক্ষক ক্ৰটিপূৰ্ণ নিৰ্মাণৰ কথা দৃষ্টিগোচৰ কৰি আহিছিল যদিও ৰাইজৰ দাবী আওকাণ কৰা হয় । বৰ্তমান আৱাসিকসকলে জিডিছিএল নামৰ কোম্পানীটোৰ চৰম দায়িত্ব - জ্ঞানহীনতাৰ বাবে ভোগ কৰিব লগা হৈছে যান্ত্ৰনা । সেয়ে ৰাইজে এই নিৰ্মাণকাৰ্যৰ পুনৰ পৰ্যবেক্ষণ কৰি পথৰ কাম সম্পূৰ্ণ হোৱাৰ পূৰ্বে নলা নৰ্দমাৰ সঠিক জোখমাখ কৰি নিৰ্মাণ কৰিবলৈ দাবী জনাইছে । অন্যথা গণতান্ত্ৰিক আন্দোলনৰো হুংকাৰ দিছে আৱাসিকসকলে ।
