টীয়ক, 20 অক্টোবৰ : টীয়ক চাহ বাগিচাৰ চিকিৎসক ডা: দেবেন দত্তৰ হত্যাকাণ্ডৰ গোচৰৰ বৰ্তমানেও কোনো অগ্ৰগতি লাভ নকৰাত অসন্তুষ্টি প্ৰকাশ কৰিছে চিকিৎসকগৰাকীৰ পৰিয়ালৰ লোকে ৷ উল্লেখ্য যে, মুখ্যমন্ত্ৰী সৰ্বানন্দ সোণোৱালে এই গোচৰৰ বিচাৰ প্ৰক্ৰিয়া ফাষ্টট্ৰেক আদালতত কৰাৰ কথা ঘোষণা কৰিছিল ৷ কিন্তু, এই ঘোষণা অসাৰ প্ৰতিপন্ন হোৱাত অন্যান্য লোকসকলৰ লগতে চিকিৎসকগৰাকীৰ পৰিয়ালৰ লোকে তীব্ৰ অসন্তষ্টি ব্যক্ত কৰিছে ।
পৰিয়ালৰ লোকে মুখ্যমন্ত্ৰী সোণোৱালৰ প্ৰতি তীব্ৰ অসন্তুষ্টি ব্যক্ত কৰাৰ লগতে সমগ্ৰ দেশজুৰি প্ৰতিক্ৰিয়া সৃষ্টি হোৱা ঘটনাটো গুৰুত্ব সহকাৰে নোলোৱাৰ অভিযোগ তুলিছে । সেয়েহে, পুনৰ মুখ্যমন্ত্ৰীক ঘটনাটো সন্দৰ্ভত বিবেচনা কৰিবলৈ কাতৰ অনুৰোধ জনাইছে মৃত চিকিৎসকগৰাকীৰ পত্নীয়ে ৷