গুৱাহাটী,২২জুন : আজিৰে পৰা আৰম্ভ হ'ল অম্বুবাচী মেলা । 25 জুনলৈ অনুষ্ঠিত হ'বলগীয়া এই অম্বুবাচী মেলা উপলক্ষে কামাখ্যা ধামলৈ সমাগম ঘটিছে অগণন ভক্তৰ । ইতিমধ্যেই কামাখ্যা ধামত সম্পূৰ্ণ কৰি তোলা হৈছে সকলো প্ৰস্তুতি । উমানন্দৰ দর্শনাৰ্থী সকলৰ বাবেও উমানন্দৰ চৰকাৰী ফেৰী ঘাটটোত সম্পূৰ্ণ কৰি তোলা হৈছে সকলো প্ৰস্তুতি । ফেৰী ঘাটৰ দায়িত্বত থকা বিভাগীয় কৰ্মচাৰী কমলেশ্বৰ কলিতাই জানিবলৈ দিয়া অনুসৰি অম্বুবাচীৰ ভক্ত সকলে কামাখ্যা দৰ্শনৰ পিছত উমানন্দৰ দৰ্শনৰ বাবে যায় । যাৰ বাবে দৰ্শনাৰ্থীসকলৰ সুবিধাৰ্থে বিশেষ ব্যৱস্থা গ্ৰহণ কৰা হৈছে । পুৱা 8 বজাৰ পৰা আবেলি চাৰি বজালৈ দুখন ফেৰীৰে অনা-নিয়া কৰা হ'ব দর্শনাৰ্থী সকলক । ঘাটটোৰ পৰা এছ.বি.ৰঙা নদী আৰু এছ বি.বগা.নদী নামৰ দুখন ফেৰীৰে প্ৰতি আধা ঘণ্টাৰ অন্তৰত দর্শনাৰ্থী সকলক অনা-নিয়াৰ ব্যৱস্থা কৰা হৈছে । একে সময়তে 250 জন যাত্ৰী যাব পৰাকৈ সুবিধা কৰি দিয়া হৈছে এই ফেৰী দুখনত । প্ৰশাসন আৰু জল পৰিবহণে বিভাগে দৰ্শনাৰ্থীসকলৰ সুৰক্ষাৰ ক্ষেত্ৰতো বিশেষভাৱে গ্ৰহণ কৰিছে ব্যৱস্থা । যাত্ৰীসকলৰ সুবিধাৰ বাবে অসম চৰকাৰৰ জলপৰিবহণ বিভাগে ঘাটটোত যোগান ধৰিছে 300 লাইফ জাকেট ।
বিগত বৰ্ষৰ তথ্য অনুসৰি অম্বুবাচীৰ সময়ত প্ৰতিদিনে অগণন ভক্তৰ সমাগম ঘটিব উমানন্দলৈ । দর্শনাৰ্থী সকলক সম্পূৰ্ণ সুৰক্ষা প্ৰদান কৰি মন্দিৰ দৰ্শনৰ ব্যৱস্থা কৰা হৈছে ।
