গুৱাহাটী,২৪ আগষ্ট: চৰকাৰী বিদ্যালয় বন্ধ কৰাৰ পৰিৱৰ্তে আন্তঃগাঁথনি উন্নয়ন কৰাৰ দাবী জনালে সদৌ অসম ছাত্ৰ সন্থা চমুকৈ আছুৱে(AASU Chief Advisor Samujjal Bhattacharjya) । উল্লেখ্য যে হাইস্কুল শিক্ষান্ত পৰীক্ষাত উত্তীৰ্ণৰ হাৰ শূণ্য হোৱা বিদ্যালয়সমূহ বন্ধ কৰি দিয়াৰ সিদ্ধান্ত গ্ৰহণ কৰিছে ৰাজ্য চৰকাৰে(Assam government's decision to close 34 school) । সেই অনুসৰি ৰাজ্যৰ ৩৪ খন হাইস্কুল বন্ধ কৰাৰ সিদ্ধান্ত লৈছে চৰকাৰে । চৰকাৰী এই সিদ্ধান্তক লৈ তীব্ৰ প্ৰতিক্ৰিয়া প্ৰকাশ কৰিছে আছুৰ মুখ্য উপদেষ্টা সমুজ্জ্বল কুমাৰ ভট্টাচাৰ্যই ।
বুধবাৰে সংবাদ মাধ্যমৰ আগত তেওঁ কয় যে চৰকাৰে বিদ্যালয় বন্ধ কৰা আৰু একত্ৰিত কৰা মানেই চৰকাৰৰ দক্ষতা নুবুজায় । একত্ৰীৰণ প্ৰক্ৰিয়াটো চৰকাৰে পৰ্যালোচনা কৰাৰ প্ৰয়োজন আছে । বিদ্যালয়ৰ সংখ্যা হ্ৰাস কৰাৰ বিপৰীতে চৰকাৰে সমগ্ৰ ব্যৱস্থাটোৰ পুনৰীক্ষণ কৰি সিদ্ধান্ত গ্ৰহণ কৰিব লাগে । পুনৰীক্ষণ নকৰা পৰ্যন্ত এই সিদ্ধান্ত স্থগিত ৰখাৰ বাবে তেওঁ চৰকাৰক দাবী জনায় । বিদ্যালয় বন্ধ কৰি দিয়াটো কৃতিত্ব নহয় বুলিও তেওঁ উল্লেখ কৰে ।
আছুৰ মুখ্য উপদেষ্টাগৰাকীয়ে প্ৰতিটো জনগোষ্ঠীয় ভাষা উন্নয়ন আৰু বিকাশৰ বাবে চৰকাৰক গুৰুত্ব দিয়াৰ দাবী জনায় সমুজ্জ্বল কুমাৰ ভট্টাচাৰ্যই । তেওঁ লগতে কয় যে কি কাৰণত চৰকাৰী বিদ্যালয়ত ছাত্ৰ ছাত্ৰীৰ সংখ্যা হ্ৰাস পাইছে সেই বিষয়ে আলোচনা কৰা প্ৰয়োজন আছিল ।
চৰকাৰী বিদ্যালয় সমূহ আৰ্কষণীয় কৰি তুলিব লাগিব বুলি সদৰী কৰি তেওঁ কয় যে অসমীয়া মাধ্যমত প্ৰাক-প্ৰাথমিক শ্ৰেণীৰ ব্যৱস্থা কৰিব লাগে । চৰকাৰী খণ্ডত অসমীয়া ভাষা, বড়ো ভাষা আৰু মাতৃভাষা মাধ্যমৰ বিদ্যালয়ৰ জয়যাত্ৰা অব্যাহত ৰাখিব লাগে বুলি তেওঁ দাবী কৰে । তেওঁ কয় যে তৃতীয় শ্ৰেণীৰ পৰাই নহয় তাৰ তলৰ শ্ৰেণীৰ পৰাই চৰকাৰে অসমীয়াৰ লগতে ইংৰাজী ভাষাত গুৰুত্ব দিব লাগে ।
লগতে পঢ়ক : উন্নতমানৰ শিক্ষা প্ৰদানৰ স্বাৰ্থতহে ডিব্ৰুগড় বিশ্ববিদ্যালয়ৰ মাচুল বৃদ্ধি
