গুৱাহাটী, 11 আগষ্টঃ এইবাৰ শক্তিপীঠ কামাখ্যা মন্দিৰকলৈ অনলাইনত প্ৰৱঞ্চনাৰ জাল একাংশ দুষ্ট চক্ৰৰ। মহামাৰী কৰ'ণা ভাইৰাছৰ সংক্ৰমণৰ প্ৰতি লক্ষ্য ৰাখি বিগত কেইবা মাহ ধৰি বন্ধ হৈ আছে শক্তিপীঠ কামাখ্যা মন্দিৰ । কিন্তু তেনে সময়তে কামাখ্যা দৰ্শনৰ নামত ভুৱা প্ৰচাৰ আৰম্ভ কৰিছে এটা দুষ্টচক্ৰই । দুষ্টচক্ৰটোৱে ধন দিলে অনলাইন যোগে দেৱীৰ দৰ্শন কৰাব বুলি সামাজিক মাধ্যমত উল্লেখ কৰিছে । ফেচবুকত এটা পেজ খুলি এনেদৰেই প্ৰৱঞ্চকে মেলিছে ধন সংগ্ৰহৰ জাল ।
ইফালে, পহিলা ছেপ্তেম্বৰৰ পুৱা 10 বজাৰ পৰা অনলাইন যোগে মা কামাখ্যাৰ দৰ্শন কৰিব পাৰিব বুলি অপপ্ৰচাৰত লিপ্ত হৈছে দিব্য শক্তিপীঠ নামৰ ফেচবুক পেজটোৱে । দুষ্টচক্ৰৰ এই কাণ্ড দেখি আচৰিত হৈ পৰিছে মন্দিৰ পৰিচালনা সমিতি । আনহাতে দুষ্টচক্ৰৰ এনে প্ৰৱঞ্চনাৰ জালত ভৰি নিদিবলৈ ভক্ত সকলক আহ্বান জনাইছে মন্দিৰ পৰিচালনা সমিতিৰ বিষয়ববীয়া সকলে ।
যি সময়ত কৰ'ণা সংক্ৰমণৰ প্ৰতি লক্ষ্য ৰাখি মহা অম্বুবাচী মেলা, দেওধনী নৃত্য আদিৰ লগতে বিভিন্ন পূজা-পাৰ্বন কেৱল মাত্ৰ পৰম্পৰা ৰক্ষা কৰি অনুষ্টুপীয়াকৈ পালন কৰিছে, সেই সময়তে একাংশ দুষ্টচক্ৰই কামাখ্যা ধামৰ নামত সামাজিক মাধ্যমত চলোৱা অপপ্ৰচাৰক লৈ ক্ষুব্ধ হৈ পৰিছে মন্দিৰ পৰিচালনা সমিতি ৷ উক্ত অপ প্ৰচাৰৰ বিৰুদ্ধে উপযুক্ত ব্যৱস্থা গ্ৰহণ কৰিব বুলি সাংবাদিকৰ আগত মন্তব্য কৰে পৰিচালনা সমিতিৰ সদস্য সকলে । উল্লেখ্য যে, ইয়াৰ পূৰ্বেও বিভিন্ন সময়ত একাংশ দুষ্টচক্ৰই চলাই আহিছিল ভুৱা অপ-প্ৰচাৰ । যাৰ বাবে কেইবাবাৰো আৰক্ষীৰ কাষ চাপিছিল মন্দিৰ পৰিচালনা সমিতি ।
লগতে পঢ়ক- অৱস্থান ধৰ্মঘটত বহিল বিধায়ক ৰূপজ্যোতি কুৰ্মী
