ৰঙিয়া, ২৩ জুলাইঃ কামৰূপ জিলাৰ বৃহত্তৰ ৰঙিয়া অঞ্চলত বহু বানাক্ৰান্তই পোৱা নাই চৰকাৰী সাহাৰ্য । ৰাজ্যত মহাপ্ৰলয়ৰ সৃষ্টি কৰা সংহাৰী বানপ প্ৰকোপ সাময়িক ভাবে কমিছে যদিও এতিয়াও স্বাভাৱিক জন-জনজীৱনলৈ ঘুৰি যাব পৰা নাই বানাক্ৰান্ত ৷ বৰলীয়া লৈৰ বানত ক্ষতিগ্ৰস্ত হোৱা ৰঙিয়াৰ কলমণি,তাৰাকুছি , বৰকুকুৰীয়া,গোপালপুৰকে ধৰি অৰ্ধশতাধিক গাঁৱৰ শ শ পৰিয়ালে এতিয়াও টিৰপালৰ তলত আশ্ৰয় লব লগীয়া হৈছে ।
ইমানেই নহয় বানত নষ্ট হৈছে হাজাৰ হাজাৰ বিঘা খেতিৰ মাটি । বানত পুখুৰীৰ পৰা মাছ ওলাই যোৱাত হাহাকাৰ লাগিছে মৎস্য পালকসকলৰ । খাদ্যৰ অভাৱত অনাহাৰে থাকিব লগা হৈছে বহু বানাক্ৰান্তই । সমান্তৰালৈ পশু খাদ্যৰো অভাৱ হোৱাত পোহনীয়া জন্তুকলৈ চিন্তিত হৈ পৰিছে বন্যাৰ্ত । কিন্তু বান সাহাৰ্যৰ নামত কেৱল 1 কেজি চিৰা দি বানাক্ৰান্তৰ লগত প্ৰতাৰণা কৰাৰ অভিযোগ উঠিছে চৰকাৰ তথা জিলা প্ৰশাসনৰ বিৰুদ্ধে ৷ সেয়ে, প্ৰতাৰক জনপ্ৰতিনিধিক এতিয়া তীব্ৰ ভাষাৰে গৰিহনা দিছে বানত সৰ্বস্ব হেৰুওৱা ৰাইজে ৷
