গুৱাহাটী, 18 নৱেম্বৰ : সোমবাৰে দিছপুৰ প্ৰেছ ক্লাবত নৱেম্বৰ মাহৰ 'মুখামুখি' অনুষ্ঠানৰ অতিথি হিচাপে উপস্থিত থাকে অসম পৰ্যটন উন্নয়ন নিগমৰ অধ্যক্ষ জয়ন্ত মল্ল বৰুৱা । অনুষ্ঠানত উপস্থিত থাকি সাংবাদিকৰ বিভিন্ন প্ৰশ্নৰ উত্তৰ প্ৰদান কৰে বৰুৱাই ৷ পৰ্যটকৰ প্ৰসংগত বৰুৱাই মন্তব্য কৰে যে, ৰাজকোষৰ টকা খৰচ কৰি কোনো ঠাইতে ভ্ৰমণৰ বাবে তেওঁ যোৱা নাই ৷ লগতে তেওঁ কয় যে, পৰ্যটন নিগমত বাজেট বৰ্তমান 25 কোটি টকাহে ৷ এই টকাৰ পৰিমাণ 50 কোটিলৈ বঢ়াবলৈ চেষ্টা চলাই থকা বুলিও তেওঁ জানিবলৈ দিয়ে ৷
বি বৰুৱা কলেজত অধ্যয়ন কৰা দিনৰে পৰা ৰাজনীতিৰ প্ৰতি আকৰ্ষিত হৈছিল বুলি মন্তব্য কৰে জয়ন্ত মল্ল বৰুৱাই ৷ বৰ্তমান সময়ৰ অসমৰ ৰাজনীতিবিদসকলৰ ভিতৰত হিমন্ত বিশ্ব শৰ্মাক সফল মন্ত্ৰী বুলি উল্লেখ কৰে তেওঁ ৷ কংগ্ৰেছৰ হৈ ৰাজনীতি কৰা সময়ত বহু অনিয়ম দেখিছিল বুলি কোৱাৰ লগতে তেওঁ কয় যে, কংগ্ৰেছৰ সময়ত গণতন্ত্ৰই নহয়, পৰিয়ালতন্ত্ৰইহে গুৰুত্ব লাভ কৰিছিল ৷ ক্ষমতাৰ স্বাৰ্থতে কংগ্ৰেছ ত্যাগ কৰা বুলি ওলোৱা বাতৰিকো নস্যাৎ কৰে বৰুৱাই ৷
অসমৰ পৰ্যটন ক্ষেত্ৰৰ উন্নয়নৰ হকে কাম কৰি আছো বুলি জানিবলৈ দিয়ে জয়ন্ত মল্ল বৰুৱাই ৷ গুৱাহাটীত অনুষ্ঠিত হ'বলগা ফিল্ম ফেষ্টিভেলক লৈও মন্তব্য জয়ন্ত মল্ল বৰুৱাৰ ৷ 300 কোটি টকা খৰচ হ'ব বুলি বাতৰি প্ৰকাশ পালেও তেওঁ নিজেই এই সম্পৰ্কে জ্ঞাত নহয় বুলি জানিবলৈ দিয়ে ৷ মুম্বাইৰ বাহিৰত প্ৰথমবাৰ অসমত অনুষ্ঠিত হ'বলগা ফিল্ম ফেষ্টিভেলৰ বাবে অসমত পৰ্যটকৰ সংখ্যা বৃদ্ধি পাব বুলি বৰুৱাই মন্তব্য কৰে । চিৰিয়াখানাত গড় ৰখাক লৈ তেওঁ কয় যে, তাত পৰ্যটনে একো কৰিব নোৱাৰো, চিৰিয়াখানাৰ সম্পূৰ্ণ দায়িত্ব বন বিভাগৰহে ৷
আৰু পঢ়ক : বৰপেটাত ভূমিকেন্দ্ৰিক সংঘাত : আহত ৬
