ৰঙিয়া,12 মে': ৰঙিয়াৰ চৰকাৰী চিকিৎসালয় সমূহত কৰ'ণাৰ প্ৰতিষেধক প্ৰদান অব্যাহত আছে । বুধবাৰে ৰঙিয়াৰ স্বাস্থ্যখণ্ডৰ অন্তৰ্গত চিকিৎসালয়, মহকুমা অসামৰিক চিকিৎসালয়ত ১২০ গৰাকী আৰু সিদ্ধিনাথ শৰ্মা প্ৰাথমিক স্বাস্থ্যকেন্দ্ৰত ৯০ গৰাকী লোকক কৰ'ণা প্ৰতিষেধক প্ৰদান কৰা হৈছে । কেন্দ্ৰ দুটাত ৪৫ বছৰৰ পৰা ঊৰ্দ্ধৰ লোকসকলক প্ৰদান কৰা হৈছে কৰ’ণাৰ প্ৰতিষেধক ।
এই কেন্দ্ৰ দুটাত অফলাইনযোগে আবেদন কৰা লোকসকলক প্ৰতিষেধক প্ৰদান কৰা হৈছে । আনহাতে অস্থায়ীভাৱে স্থাপন কৰা প্ৰতিষেধক প্ৰদান কেন্দ্ৰ জৱাহৰলাল নেহৰু শিশু বিদ্যালয়ত 90 গৰাকী আৰু বুনিয়াদী প্ৰশিক্ষণ কেন্দ্ৰত 88 গৰাকী লোকক কৰ’ণাৰ প্ৰতিষেধক প্ৰদান কৰা হৈছে । এই দুটা কেন্দ্ৰত কেৱল অনলাইনযোগে আবেদন কৰা ১৮-৪৪ বছৰ বয়সৰ লোকসকলক প্ৰতিষেধক প্ৰদান কৰি থকা হৈছে ।
লগতে মধ্য পাণ্ডুৰী ক্ষুদ্ৰ স্বাস্থ্য কেন্দ্ৰত 80 গৰাকী লোকৰ লগতে বাৰাংহাটী ক্ষুদ্ৰ প্ৰাথমিক স্বাস্থ্য কেন্দ্ৰত 100 গৰাকী, কণিহা ৰাজ্যিক চিকিৎসালয়ত 60 গৰাকী ব্যক্তিক প্ৰতিষেধক প্ৰদান কৰা হয় । উল্লেখযোগ্য যে, ৰঙিয়াত শেহতীয়াভাৱে কৰ'ণাত আক্ৰান্তৰ সংখ্যা ৪৪৫ গৰাকীলৈ বৃদ্ধি পাইছে । তাৰ প্ৰতি লক্ষ্য ৰাখি প্ৰতিদিনে ৰঙিয়াৰ এইকেইটা কেন্দ্ৰত কৰ'ণাৰ ভেকচিন প্ৰদান কৰি থকা হৈছে । এই তথ্য সদৰী কৰিলে ৰঙিয়া প্ৰাথমিক স্বাস্থ্য কেন্দ্ৰৰ বহুমুখী স্বাস্থ্যকৰ্মী হৰেশ্বৰ দাসে ।
লগতে পঢ়ক : জেএচবি অসামৰিক চিকিৎসালয়ত ক’ভিড যোদ্ধাৰ বাবে নাই চৰকাৰী আৱাসৰ ব্যৱস্থা
