নিউজ ডেস্ক, 2 নৱেম্বৰঃ বিহাৰ-উত্তৰ প্ৰদেশৰ সমান্তৰালে অসমতো উদযাপন ষট পূজা । লোকে লোকাৰণ্য মহাবাহু ব্ৰহ্মপুত্ৰ পাৰঘাট ৷ পূজা উপলক্ষে বৰলুইতৰ পাৰত হাজাৰ হাজাৰ ভক্তৰ সমাগম ৷ মহাবহু ব্ৰহ্মপুত্ৰৰ পাৰত অসমৰ ষট পূজা প্ৰত্যক্ষ কৰি আপ্লুত বিহাৰৰ পৰ্যটক ৷
আজি ষঠ পূজা ৷ সমাজৰ পৰা অপায় অমংগল দূৰ কৰাৰ কামনাৰে বিহাৰী সম্প্ৰদায়ৰ লোকসকলে সূৰ্য দেৱতাক পূজা কৰে আজিৰ দিনটোত । সূৰ্য্য অস্ত যোৱাৰ পূৰ্বে পুখুৰী বা নৈৰ পানীত নামি ভক্তপ্ৰাণ ৰাইজে সূৰ্যক পূজা কৰাৰ লগতে, পূজাৰ পাছদিনা অৰ্থাৎ সপ্তমীৰ পুৱাৰ ভাগত উদয়গামী সূৰ্যক অৰ্ঘ্য প্ৰদান কৰি ষট পূজাৰ সামৰণি কৰে ভক্তসকলে ৷
সমগ্ৰ দেশৰ লগতে অসমতো দেখা গ'ল ষঠ পূজাৰ ব্যাপক উচাহ উদ্দীপনা ৷ মহানগৰীত সূৰ্যাস্তৰ পাচতে ব্ৰহ্মপুত্ৰৰ ঘাটসমূহত ভিৰ কৰিছে ভক্তই । মালিগাঁও, পাণ্ডু, মাছখোৱা, ফাচীবজাৰৰ ব্ৰহ্মপুত্ৰ ঘাটত জাকজমকতাৰে আয়োজন কৰা হৈছে ষট্ পূজা । বিয়লি ৩ বজাৰ পৰা ধৰ্মীয় ৰীতি-নীতি অনুসৰি চলি আছে পূজা-অৰ্চনা ।
অসম মেঘালয় সীমান্তৱৰ্তী অঞ্চলৰ যোৰাবাটত থকা শ্ৰী শ্ৰী ভদ্ৰকালেশ্বৰী মন্দিৰ প্ৰাংগণতো এক অস্থায়ী পকীৰে নিৰ্মিত পুখুৰী সাজি উদযাপন কৰিছে ষট পূজা ৷
ব্ৰহ্মপুত্ৰৰ ফাঁচী বজাৰ ঘটৰ পূজাস্থলীত অসম চৰকাৰৰ কেইবাগৰাকী বিধায়ক উপস্থিত হৈ ভোজপুৰী সম্প্ৰদায়ৰ লোক সকলক ষট পূজাৰ শুভেচ্ছা জ্ঞাপন কৰি অসমত থকা সকলো সম্প্ৰদায়ৰ লোকক মিলাপ্ৰীতি অটুট ৰখাৰ আহ্বান জনায় ।
ডিব্ৰুগড়ত ব্ৰহ্মপুত্ৰৰ কছাৰীঘাট ষট পূজাস্থলীত উপস্থিত মুখ্যমন্ত্ৰী সৰ্বানন্দ সোণোৱাল ৷ ভোজপুৰী সমাজক ষট পূজাৰ শুভেচ্ছা, শুভকামনাৰ লগতে ষট পূজাৰ মহত্ব অনুধাৱন কৰি একতা প্ৰতিষ্ঠাৰ আহ্বান জনাই সোণোৱালে ।
যোৰহাট চহৰখনৰ প্ৰায় ৮ টাকৈ ঠাইত পালন কৰা হৈছে ষঠ পূজা ৷ ভক্তপ্ৰাণ ভোজপুৰি লোকৰ সমাগমে দ্বিতীয় গংগালৈ পৰিণত কৰে পূজাদুবিঘাট । ঠিক একেদৰে, বিলাসীপাৰা চহৰৰ বামুনপাৰাৰ গৌৰাং নৈৰ পাৰত ষট্ পূজা উপলক্ষে একত্ৰতি হয় ভিন্ন সম্প্ৰদায়ৰ ভক্তপ্ৰাণ ৰাইজ ৷
