নিউজ ডেস্ক, 17 মাৰ্চঃ সমগ্ৰ বিশ্বতে মহামাৰী ৰূপ ধাৰণ কৰা কৰ'ণা ভাইৰাছক লৈ এতিয়া শংকিত দেশবাসীৰ লগতে ৰাজ্যবাসী ৷ যাক লৈ এতিয়া তৎপৰ হৈ পৰিছে ভিন্ন প্ৰান্ত ৷
ধেমাজিঃ কৰ'ণাৰ বাবে ধেমাজিবাসীক আতংকিত নহ'বলৈ আহ্বান জিলা উপায়ুক্তৰ ৷ ধেমাজিত জিলাত এতিয়া যোজা চলাইছে প্ৰায় 50 খন বিচনাযুক্ত আইচ'লেশ্যন কোঠাৰ ৷ জিলাখনৰ বিভিন্ন ৰে'লৱে ষ্টেচনত ইতিমধ্যে চিকিৎসক আৰু স্বাস্থ্য বিভাগৰ দল উপস্থিত থাকি দূৰণিবটীয়া ৰে'লত অহা ৰোগীসকলৰ স্বাস্থ্য পৰীক্ষা কৰাৰ নিৰ্দেশ প্ৰদান কৰিছে ৷
শিৱসাগৰঃ কৰ'ণা ভাইৰাছৰ প্ৰতিৰোধমূলক সজাগতা সৃষ্টিৰ বাবে মঙলবাৰে শিৱসাগৰ নগৰৰ কেন্দ্ৰীয় বজাৰৰ সন্মুখত অগ্ৰণী প্ৰতিষ্ঠান সম্প্ৰীতি ক্লাৱে এক হাত ধোৱা সজাগতা কাৰ্যসূচী অনুষ্ঠিত কৰে ৷ শিৱসাগৰ জিলা উপায়ুক্ত লক্ষ্মীনন্দন গগৈয়ে শুভাৰম্ভ কৰা সজাগতা আনুষ্ঠানত শিৱসাগৰ জিলাৰ অতিৰিক্ত উপায়ুক্ত বিদিত দাস,পৌৰনেত্ৰী মৃদুস্মিতা সিনহা,জিলা তথ্য আৰু জনসংযোগ বিষয়া হাছনাহানা বেগম, শিৱসাগৰ বিণিজ্য মহাবিদ্যালয়ৰ অধ্যক্ষ ড৹ সৌমাৰজ্যোতি মহন্ত আদি বহু লোক উপস্থিত থাকে ৷
হাজোঃ হাজোৰ ৰামদিয়াতে কৰ'ণা ভাইৰাছ সন্দৰ্ভত সজাগতা সভা অনুষ্ঠিত কৰে ভাৰত চৰকাৰৰ মানৱ উন্নয়ন মন্ত্ৰালয়ৰ উদ্যোগত ৷ এই সজাগতা সভাত গোপাজিৎ দাস, যুটীয়া সঞ্চালক কীৰ্তি তিৱাৰী, এল.আৰ.বিশ্ব নাথ গুৱাহাটী দূৰদৰ্শন কেন্দ্ৰৰ অৱসৰপ্ৰাপ্ত সঞ্চালক ৰমনী মালাকৰকে ধৰি ৰামদিয়া অঞ্চলৰ বহু লোক উপস্থিত থাকে ৷ ইয়াৰেপৰি কৰ'ণা ভাইৰাছৰ সংক্ৰমনৰ প্ৰতি লক্ষ্য ৰাখি মঙলবাৰে আবেলি ৫ বজাৰ পৰা হাজোৰ শ্ৰী শ্ৰী হয়গ্ৰীব মাধৱ দেৱালয়কে প্ৰমুখ্য কৰি হাজোৰ পঞ্চতীৰ্থ দেৱালয়ৰ দুৱাৰ বন্ধ কৰি ৰাখে ৷
গুৱাহাটীঃ মহানগৰীৰ এটা অন্যতম তীৰ্থস্থান তথা পৰ্যটন ক্ষেত্ৰ হৈছে মা কামাখ্যা ধাম ৷ দেশ-বিদেশৰ পৰা প্ৰতিদিনেই কামাখ্যালৈ আহে হাজাৰ-হাজাৰ দৰ্শনাৰ্থীৰ লগতে পৰ্যটক ৷ কিন্তু দৰ্শনাৰ্থী অহাত কোনো বাধ্যবাধকতা ৰখা নাই যদিও কেইবাটাও সতৰ্কতামূলক ব্যৱস্থা গ্ৰহণ কৰিছে মন্দিৰ পৰিচালনা সমিতিয়ে । দৰ্শনাৰ্থীৰ পৰা দূৰত্ব বজাই ৰখাৰ লগতে পূজাৰীসকলক চেনিটাইজাৰেৰে বীজাণুমুক্ত আৰু প্ৰতিদিনে কাপোৰ চাফ চিকুণ কৰি ৰাখিবলৈ নিৰ্দেশ দিয়ে স্বাস্থ্য বিভাগে ৷
গুৱাহাটীঃ গুৱাহাটী ৰে'ল ষ্টেচনত ৰে'ল বিভাগে এই ভাইৰাছৰ বিৰুদ্ধে চলাইছে ব্যাপক তৎপৰতা ৷ গুৱাহাটীত প্ৰৱেশ কৰা প্ৰতিটো ৰে'লৰ যাত্ৰীসকলৰ স্বাস্থ্য পৰীক্ষা অবিহনে ওলাই যাবলৈ দিয়া হোৱা নাই ষ্টেচনৰ পৰা ৷ স্বাস্থ্য পৰীক্ষৰ পিছত কিদৰে কৰ'ণা ভাইৰাছৰ সংক্ৰমণৰ পৰা নিজৰ লগতে অন্য লোকক ৰক্ষা কৰিব পাৰি এই সম্পৰ্কেও সজাগতা সৃষ্টি কৰা হৈছে ৰে'ল ষ্টেচনত ৷
জোনাইঃ কৰ'ণা ভাইৰাছক লৈ চুবুৰীয়া ৰাজ্য অৰুণাচলৰ পূৱ চিয়াং জিলা প্ৰশাসনৰ সতৰ্কতা ৷ বিভিন্ন স্থানৰ পৰা ৰে'ল আৰু নৈশ বাছৰ পৰা কৰ্মসূত্ৰে অহা আৰু স্বগৃহলৈ প্ৰত্যাৱৰ্তন কৰা লোকক পূৱ চিয়াং জিলা প্ৰশাসন আৰু স্বাস্থ্য বিভাগে পৰীক্ষা কৰাৰ লগতে সতৰ্কতা অৱলম্বন কৰিছে ৷
ৰঙাপাৰাঃ কৰ'ণা ভাইৰাছক লৈ সষ্টম উত্তৰ পূব সীমান্ত ৰেলৱে বিভাগ । আজি ৰঙাপৰা ৰে'লৱে ষ্টেচনত পুৱা ৰঙাপৰা ৰে'লৱে চিকিৎসালয়ৰ মুখ্য চিকিৎসক ডাঃ ৰামকেশ প্ৰসাদৰ নেতৃত্বত এটি চিকিৎসকৰ দলে ৰেলত অহা প্ৰত্যেকগৰাকী যাত্ৰীৰ উত্তাপ নিৰীক্ষণ যন্ত্ৰৰে স্বাস্থ্য পৰীক্ষা কৰে । ৰঙাপৰাত বৰ্তমানলৈকে এজনো কৰ'ণা ভাইৰাছত আক্ৰান্ত ৰোগী চিনাক্ত হোৱা নাই বুলি প্ৰকাশ কৰে চিকিৎসক ডাঃ ৰামকেশ প্ৰসাদে ৷
শিলচৰঃ ভাৰত চৰকাৰৰ তথ্য আৰু দূৰ সঞ্চাৰ বিভাগৰ অধীনত থকা আঞ্চলিক প্ৰচাৰ দফতৰৰ উদ্যোগত আজি শিলচৰ চহৰৰ বিভিন্ন ঠাইত কৰ'ণা ভাইৰাছ বিষয়ত এক সজাগতা কাৰ্যসূচী অনুষ্ঠিত কৰে ৷ সাধাৰণ মানুহক কৰ'ণা ভাইৰাছৰ বাবে আতংকিত হোৱাৰ পৰিৱৰ্তে কেনে ধৰণৰ সতৰ্কতামূলক ব্যৱস্থা লব পাৰি সেই বিষয়ে সৰল ভাষাত বুজাই দিয়ে ৷ আনহাতে শিলচৰ ৰে'ল ষ্টেছনত বিভিন্ন ঠাইৰ পৰা অহা ৰে'লৰ যাত্ৰীসকলৰ পৰীক্ষা কৰোতে আজি এগৰাকী আৰ্জেণ্টিনাৰ নাগৰিকক শিলচৰ মেডিকেল কলেজত পঠোৱা হয় স্বাস্থ্য পৰীক্ষাৰ বাবে ৷
নাহৰকটীয়াঃ নাহৰকটীয়াৰ কেন্দ্ৰীয় অখণ্ড ভাগৱত পাঠ সমিতিয়ে স্থানীয় গড়কাপ্টানি বিভাগৰ বাকৰিত বিগত ১৪ মাৰ্চৰ পৰা আয়োজন কৰিছিল ভাগৱত পাঠৰ ৷ কিন্তু কৰ'ণা’ ভাইৰাছ বিয়পাৰ আশংকাত প্ৰশাসনৰ আহ্বানত আয়োজক সকলে মাত্ৰ তিনিটা দিনৰ ভিতৰতে সামৰিলে এই ধৰ্মীয় অনুষ্ঠানটি ৷ উল্লেখ্য যে, ইতিপূৰ্বে ডিব্ৰুগড় জিলা প্ৰশাসনে সাম্প্ৰতিক পৰিস্থিতিত ৰাজহুৱা অনুষ্ঠান আয়োজনৰ ক্ষেত্ৰত সতৰ্ক হ’বলৈ নিৰ্দেশনা জাৰি কৰাৰ উপৰিও ৰাইজক অনাহকত ঘৰৰ পৰা নোলাবলৈকো আহ্বান জনায় ৷
চিৰাংঃ আনহাতে চিৰাং জিলাৰ স্বাস্থ্য বিভাগে ভূটান গেটৰ পৰা ডেৰ কি:মি: নিলগত নামমাত্ৰ এটা স্কেনিং কেন্দ্ৰ খুলিছে যদিও এতিয়ালৈ পৰ্যাপ্ত কোনো ধৰণৰ ব্যৱস্থা লোৱা নাই কৰ্তৃপক্ষই ৷ অসম চৰকাৰৰ তৰফৰ পৰা ঘোষণা কৰা অনুসৰি বৰ্তমানলৈ আন্তৰ্জাতিক সীমান্ত বন্ধ কৰা নাই চিৰাং জিলাৰ ভাৰত-ভূটান সীমান্তৰ দাদগিৰি গেটত ৷
কটন বিশ্ববিদ্যালয়ঃ গুৱাহাটী বিশ্ববিদ্যালয়ৰ পাচত এইবাৰ কৰ'ণাক লৈ সতৰ্কতা কটন বিশ্ববিদ্যালয়ত । মঙলবাৰে এক জাননীৰ জৰিয়তে কটন বিশ্ববিদ্যালয়ৰ পঞ্জীয়কে হোষ্টেল খালী কৰাৰ নিৰ্দেশ জাৰি কৰিছে ৷ যাৰ বাবে হোষ্টেল বন্ধ হোৱাৰ ফলত বহুতো অসুবিধাৰ সৃষ্টি হৈছে কটনৰ ছাত্ৰ ছাত্ৰী সকল ৷
তিনিচুকীয়াঃ তিনিচুকীয়াতো জিলা প্ৰশাসন আৰু স্বাস্থ্য বিভাগে ৰাইজক সজাগ সচেতন হ'বলৈ বিভিন্ন কাৰ্যসূচী গ্ৰহণ কৰিছে ৷ মঙলবাৰে তিনিচুকীয়া অসামৰিক চিকিৎসালয়ৰ সভা গৃহত জিলা স্বাস্থ্য বিভাগে এক সংবাদমেল অনুষ্ঠিত কৰি কৰ'ণা ভাইৰাছ সংক্ৰমণৰ পৰা কেনেকৈ বাছি থাকিব পাৰি সেই পৰামৰ্শৰ লগতে জনসাধাৰণক সতৰ্কতা অৱলম্বন কৰিবলৈ আহ্বান জনায় |
তামাৰহাটঃ তামাৰহাট আৰক্ষী আৰু তামাৰহাট থানা নাগৰিক কমিটিয়ে থানাখনৰ অন্তৰ্গত মুঠ ১১৫ খন গাঁৱৰ গাঁওৰক্ষী বাহিনীৰ সদস্যৰ মাজত কৰ’ণা ভাইৰাছ সম্পৰ্কে দেওবাৰে এখন সজাগতা সভা অনুষ্ঠিত কৰে ৷ সভাখনত গাঁওৰক্ষী বাহিনীৰ সদস্যসকলৰ জৰিয়তে প্ৰতিখন গাঁৱৰ কিমানজনকৈ ব্যক্তিয়ে কৰ্মসূত্ৰে বহিঃৰাজ্যত আছে তাৰ এক হিচাপ উলিয়ায় ৷
কাকপথাৰঃ কাকপথাৰ টঙনাৰ চন্দন তাঁতীক উন্নত চিকিৎসাৰ বাবে নিয়াৰ লগতে ওপৰ উবন গাঁৱৰ গনেশ গগৈক এই ৰোগত আক্ৰান্ত হোৱাৰ সন্দেহ কৰিছে ৷ দুয়োগৰাকী কেৰেলাৰ পৰা অহা বুলি জানিব পৰা গৈছে ৷
গোলাঘাটঃ কৰ'ণা ভাইৰাছক লৈ গোলাঘাট জিলা পৰিবহণ বিভাগৰ তৎপৰতা । গুৱাহাটী গোলাঘাট চলাচল কৰা দিবা নৈশ বাছ যাত্ৰীৰ সবিশেষ ল'বৰ বাবে বিশেষভাৱে নিৰ্দেশ জাৰি কৰে গোলাঘাট প্ৰশাসনে । এখন সংবাদমেলযোগে জিলা প্ৰশাসনে বাছ মালিকসকলক বাছ যাত্ৰীৰ সবিশেষ ল'বলৈ এক ফৰ্ম প্ৰদান কৰে আৰু যাত্ৰীৰ সবিশেষ সংগ্ৰহ কৰা ফৰ্ম প্ৰত্যেক দিনাই চৰকাৰী বিষয়াক প্ৰদান কৰাৰ নিৰ্দেশ দিয়ে ৷
