মৰাণ, 19নৱেম্বৰ : একাংশ জাতীয় সংগঠনৰ দায়িত্বত থকা এচাম নেতাৰ বিৰুদ্ধে অভিযোগ উত্থাপন হৈছে ধন সংগ্ৰহৰ ৷ সংগঠনৰ নাম শুনিলেই এতিয়া আতংকিত হৈ পৰে বহু ব্যৱসায়ী ৷ বিগত 15 নৱেম্বৰ তাৰিখে ডিব্ৰুগড়ৰ খোৱাঙৰ ব্যৱসায়ী এজনৰ পৰা লালী গুৰৰ ব্যৱসায় কৰা বাবে মৰাণ আবকাৰী আৰু টাইপাৰ কেইজনমান নেতাই দাবী ধমকি দি 2 লাখ টকা লোৱা এক অভিযোগ উত্থাপিত হৈছিল ।
ইতিমধ্যে বুধবাৰে ভুক্তভোগী ব্যৱসায়ীজনে টাইপাৰ এই তিনি নেতাৰ বিৰুদ্ধে আৰক্ষী থানাত এখন এজাহাৰ দিয়ে ৷ এই এজেহাৰৰ ওপৰত ভিত্তি কৰি টাইপাৰ পৰা মৰাণ মহকুমা সমিতিৰ তিনি অভিযুক্ত নেতাক অব্যাহতি দিয়া হয় । বৃহস্পতিবাৰে মৰাণত অনুষ্ঠানত এক সংবাদমেলত টাইপাৰ কেন্দ্ৰীয় সমিতিৰ সম্পাদক ৰুদ্ৰসাগৰ বুঢ়াগোঁহাইয়ে এই কথা সদৰি কৰে ৷
জানিব পৰা মতে অব্যাহতি দিয়া নেতা কেইজন ক্ৰমে মৰাণ মহকুমা সমিতিৰ কাৰ্যকৰী সভাপতি অনুপম বৰপাত্ৰ গোহাঁই, মৰাণ মহকুমা সমিতিৰ যুটীয়া সম্পাদক মিণ্টু গগৈ আৰু সহকাৰী সম্পাদক অভিজিৎ বেজবৰুৱা । এই সভাখনত তিনিওজন নেতা আইনৰ পৰা দোষমুক্ত নোহোৱালৈকে তেওঁলোকক সংগঠনৰ পৰা অব্যাহতি দিয়া হৈছে বুলিও কয় কেন্দ্ৰীয় সমিতিৰ সম্পাদকজনে ৷
লগতে সংবাদমেলখনত মৰাণ মহকুমা সমিতিৰ সভাপতি পলাশ জ্যোতি বৰগোহাঁই উপস্থিত থাকে ৷ এই সমগ্ৰ বিষয়টোৰ দ্বাৰা সংগঠনটোক জনমানসত হেয় প্ৰতিপন্ন কৰিবলৈ কৰা এক ষড়যন্ত্ৰ বুলিও উল্লেখ কৰে কেন্দ্ৰীয় সমিতিৰ সম্পাদকজনে ।
