ধুবুৰী,4 মে': ধুবুৰী জিলাৰ মাজেৰ আলগাৰ ৩য় খণ্ড গাঁৱত সংঘটিত হৈছে এক ভয়ংকৰ অগ্নিকাণ্ড ৷ অগ্নিকাণ্ডৰ ফলত চৈধ্যটাকৈ পৰিয়ালৰ ৪০ টাকৈ গৃহ ভস্মীভূত হয় । জানিব পৰা মতে, ৰন্ধন গেছৰ চিলিণ্ডাৰ বিস্ফোৰণৰ ফলতেই ভয়ংকৰ অগ্নিকাণ্ডৰ সূত্ৰপাত ঘটে । মাজেৰ আলগাৰ ৩য় খণ্ড গাঁৱৰ বাসিন্দা বাবুৰ আলীৰ ঘৰৰ পৰা জুইৰ সূত্ৰপাত হোৱাৰ পিছত জুইৰ লেলিহান শিখাই ভয়াৱহ ৰূপ ধাৰণ কৰে ।
অগ্নিকাণ্ডৰ ফলত চৈধ্যটা পৰিয়ালৰ চল্লিশটাকৈ ঘৰ, গুৰুত্বপূৰ্ণ নথি-পত্ৰসহ প্ৰায় কোটি টকা মূল্যৰ সা-সম্পত্তি ভস্মীভূত হয় ৷ অগ্নিকাণ্ডটোৰ ফলত কেইবাটাও পশুধন, হাঁহ-কুকুৰা মৃত্যুমুখত পৰে ৷ পৰৱৰ্তী সময়ত স্থানীয় ৰাইজৰ তৎপৰতাত জুই নুমুৱাবলৈ সক্ষম হয়, যাৰ ফলত ভয়ংকৰ বিপদৰ পৰা ৰক্ষা পৰে দাঁতি কাষৰীয়া এখন গাঁও ৷ ঘটনা সন্দৰ্ভত বন্দিহানা আৰক্ষী চকীত খবৰ দিয়াত ভাৰপ্ৰাপ্ত আৰক্ষী বিষয়া আব্দুল আহাদ আলীয়ে ক্ষয়-ক্ষতিৰ বুজ লয় ।
উল্লেখ্য যে, ৰমজানৰ ঈদৰ প্ৰাকক্ষণত চৈধ্যটাকৈ পৰিয়াল সৰ্বস্ৰান্ত হোৱাৰ ঘটনাই অঞ্চলটোত শোকৰ ছাঁ পেলায় ৷
লগতে পঢ়ক : টাটা ডিআই বাহনৰ খুন্দাত গুৰুতৰভাৱে আহত 5 বছৰীয়া শিশু
