নিউজ ডেস্ক, 17 আগষ্টঃ দুখীয়া জনতাৰ বাবে কেন্দ্ৰীয় চৰকাৰে গ্ৰহণ কৰা অভিলাষী আঁচনি প্ৰধানমন্ত্ৰীৰ জন-ধন যোজনাত জমা হৈছে লাখ কোটি পৰিমানৰ ধন ৷ বিশেষ আঁচনিখনত আজিৰ দিনটোলৈকে সৰ্বমুঠ জমাৰাশিৰ পৰিমান হৈছেগৈ মুঠ 1,00,831 কোটি টকা ৷ প্ৰায় 36.25 কোটি একাউন্টৰ দ্বাৰা এইসমূহ ধন জমা হৈছে এই বিশেষ আঁচনিখনত ৷
কেন্দ্ৰীয় বিত্ত মন্ত্ৰালয়ে তথ্য জনাৰ অধিকাৰ আইনৰ সহায়ত প্ৰদান কৰিছে এই তথ্য ৷ মধ্যপ্ৰদেশৰ নিমুচ জিলাৰ বাসিন্দা তথা আৰটিআই কৰ্মী চন্দ্ৰশেখৰ গৌড় নামৰ ব্যক্তিগৰাকীয়ে বিত্ত মন্ত্ৰালয়ৰ ওচৰত দাখিল কৰিছিল এই আবেদন ৷ ব্যক্তিগৰাকীৰ আবেদনৰ ভিত্তিত বিত্ত মন্ত্ৰালয়ে প্ৰদান কৰা ডাটাত চলিত বৰ্ষৰ আগষ্ট মাহৰ 17 তাৰিখলৈ অৰ্থাৎ শনিবাৰৰ দিনটোলৈ দেশৰ বিভিন্ন প্ৰান্তৰ সৰ্বমুঠ 36.25 কোটি একাউন্টত জমা হৈছে মুঠ 1,00,831 কোটি টকা ৷ আনহাতে আঁচনিখন মুকলি কৰা পাঁচ বছৰৰ ভিতৰত 4.99 কোটি অৰ্থাৎ 14 শতাংশ একাউন্টত জিৰো বেলেন্সযুক্ত বুলি তথ্য প্ৰদান কৰিছে কেন্দ্ৰীয় বিত্ত মন্ত্ৰালয়ে ৷
উল্লেখ্য যে, প্ৰধানমন্ত্ৰী জন-ধন যোজনাৰ জৰিয়তে সমাজৰ অৰ্থনৈতিকভাৱে পিচপৰা লোকসকলৰ আৰ্থিক অৱস্থাৰ উন্নতিৰ বাবে 2014 চনৰ 15 আগষ্টত মুকলি কৰিছিল প্ৰধানমন্ত্ৰী নৰেন্দ্ৰ মোডীয়ে ৷ আঁচনিখনৰ অধীনত 20বছৰ বয়সৰ পৰা 65 বছৰ বয়সৰ ভিতৰৰ লোকসকলে বেংক একাউন্ট খোলাৰ লগতে সকলোধৰনৰ বেংকি সুবিধা লাভ কৰিবলৈ সক্ষম ৷
