নিউজ ডেস্কঃ 'হল্ডমাৰ্ক' চিহ্ন বাধ্যতামূলক হ'ব সকলো ধৰণৰ সোণৰ আ-অলংকাৰৰ ক্ষেত্ৰত ৷ 2021 চনৰ 15 জানুৱাৰীৰ পৰা কাৰ্যকৰী কৰা হ'ব চৰকাৰৰ এই সিদ্ধান্ত ৷ ভাৰত চৰকাৰৰ উপভোক্তা পৰিক্ৰমা দপ্তৰৰ মন্ত্ৰী ৰাম বিলাস পাচোৱানে সদৰী কৰে চৰকাৰৰ এই সিদ্ধান্তৰ কথা ৷ সোণৰ বিশুদ্ধতা ৰক্ষাৰ কৰাৰ স্বাৰ্থত চৰকাৰে এই সিদ্ধান্ত গ্ৰহণ কৰে ৷
ভাৰত চৰকাৰে গ্ৰহণ কৰা এই সিদ্ধান্তক আদৰণি জনাইছে আ-অলংকাৰ নিৰ্মাণ কৰা প্ৰতিস্থান সমূহে ৷ বিশ্ব সোণ পৰিষদ, ভাৰত-ৰ পৰিচালক সঞ্চালক সোমাসুন্দৰম পি আৰে এক বিবৃতিযোগে চৰকাৰৰ এই সিদ্ধান্তক আদৰণি জনায় ৷ তেওঁ বিবৃতিটোত কয় যে,চৰকাৰৰ এই সিদ্ধান্তই ভাৰতত সোণৰ ব্যৱসায়ৰ এক সুকীয়া মৰ্যদা প্ৰদান কৰিব আৰু ভাৰতত সোণৰ আ-অলংকাৰ অধিক বিশ্বাসযোগ্য হৈ পৰিব ৷
আগন্তক বৰ্ষৰ 15 জানুৱাৰীত এই সম্পৰ্কে চৰকাৰে অধিসূচনা জাৰি কৰিব ৷ অধিসূচনা জাৰি কৰাৰ এবছৰ পিছত অৰ্থাৎ 2021 চনৰ 15 জানুৱাৰীৰ পৰা কাৰ্যকৰী হ'ব এই সিদ্ধান্ত ৷ উল্লেখ্য যে, 'হল্ডমাৰ্ক' হৈছে সোণৰ বিশুদ্ধতা নিৰূপণ কৰাৰ বাবে থকা এক চিহ্ন ৷ 2000 চনৰ পৰাই বিশুদ্ধ সোণৰ ক্ষেত্ৰত ব্যৱহাৰ কৰা হৈ আহিছে এই চিহ্ন ৷ বৰ্তমান ভাৰতৰ 40 শতাংশ সোণৰ অলংকাৰৰ ক্ষেত্ৰত ব্যৱহাৰ হৈ আহিছে এই 'হল্ডমাৰ্ক' ৷
