ৰঙাপৰা, ২ এপ্ৰিল : শোণিতপুৰ জিলাৰ ৰঙাপৰাবাসী বঞ্চিত হ'বলগীয়া হৈছে এটুপি বিশুদ্ধ খোৱাপানীৰ বাবে । জিলাখনৰ বহু কেইখন গাঁৱত স্থাপন কৰা হৈছিল বহুকেইটা পানী যোগান আঁচনি । কিন্তু পানী যোগান আঁচনিকেইখন স্থাপন কৰাৰ পাছতো সমাধান হোৱা নাছিল খোৱাপানীৰ অভাৱ । কিয়নো আঁচনিকেইখন স্থাপন কৰাৰ পাছৰে পৰা বিকল হৈ পৰি থাকে । ইফালে, ২০০৮ চনত শোণিতপুৰৰ চাৰিদুৱাৰ দলং বস্তিত জনস্বাস্থ্য কাৰিকৰী বিভাগে লাখ-লাখ টকা ব্যয় কৰি স্থাপন কৰিছিল পানী যোগান আঁচনি । কিন্তু দীৰ্ঘদিনৰ পৰা পানী যোগান আঁচনি বিকল হৈ পৰি থাকে । যাৰ পৰিণতিত বিশুদ্ধ খোৱাপানী এটুপিৰ বাবে হাহাকাৰ কৰিব লগীয়া হৈছে অঞ্চলবাসীয়ে ।
উল্লেখ্য যে জনস্বাস্থ্য কাৰিকৰী বিভাগৰ সচিব নৰেশ্বৰ কাকতিয়ে শুভ উদ্বোধন কৰিছিল এখন পানী যোগান আঁচনি । সম্প্ৰতি হাবি-জংঘলৰে আগুৰি থকাত এক প্ৰকাৰ ভূত বাংলালৈ পৰিণত হৈছে এই আঁচনিখন । জনস্বাস্থ্য কাৰিকৰী বিভাগৰ তেজপুৰ সংমণ্ডল ১নং ৰ অধীনত থকা পানী যোগান আঁচনিখন চোৱা-চিতাৰ অভাৱত ক্ৰমান্বয়ে জহি খহি যাবলৈ ধৰিছে। স্থানীয় ৰাইজে বিকল হৈ থকা পানী যোগান আঁচনিখন কাৰ্যক্ষম কৰি ৰাইজক বিশুদ্ধ খোৱাপানীৰ যোগান ধৰিবলৈ বিভাগটোক দাবী জনায় ।
