ৰঙিয়া,২১মে' : শিক্ষক অবিহনে চলিছে ৰঙিয়া শিক্ষাখণ্ডৰ অন্তৰ্গত ধুহিৰ দক্ষিণটাৰী পশ্চিম চোপা প্ৰাথমিক বিদ্যালয় । বিদ্যালয়খনৰ একমাত্ৰ শিক্ষক কনক কলিতা দুৰ্ঘটনাগ্ৰস্ত হৈ চিকিৎসাধীন অৱস্থাত থকাৰ বাবে বিদ্যালয়ৰ পাঠদান সম্প্ৰতি বন্ধ হৈ পৰে । যাৰ বাবে প্ৰতিদিনে কণ-কণ ছাত্ৰ-ছাত্ৰীসকলে বিদ্যালয়লৈ আহি উভতি যাবলগীয়া হয় । সোমবাৰেও কণ-কণ ছাত্ৰ-ছাত্ৰীসকলে বিদ্যালয়লৈ আহে যদিও বিদ্যালয়খনত শিক্ষক উপস্থিত নথকাত ঘৰমুৱা হ'বলগীয়া হয় । বিদ্যালয়খনত এনে অচলাৱস্থাৰ সৃষ্টি হোৱাৰ বাবে অভিভাৱক তথা স্থানীয় ৰাইজে বিদ্যালয়খনৰ সন্মুখত প্ৰতিবাদ সাব্যস্ত কৰে ।
উল্লেখ্য যে প্ৰায় ৬ মাহ পূৰ্বে প্ৰধান শিক্ষকগৰাকী অৱসৰ লোৱাৰ পাছত মাত্ৰ এজন শিক্ষকৰে বিদ্যালয়খন চলি আছিল । কিন্তু কিছুদিন পূৰ্বে বিদ্যালয়খনৰ একমাত্ৰ শিক্ষক কনক কলিতাও দুৰ্ঘটনাগ্ৰস্ত হৈ চিকিৎসাধীন হৈ থকাত বিদ্যালয়খনৰ পাঠদান বন্ধ হৈ পৰে । যাৰ বাবে এই বিদ্যালয়খনৰ ছাত্ৰ-ছাত্ৰী সকলে উপযুক্ত শিক্ষাৰ পৰা বঞ্চিত হ'বলগীয়া হয় । শিক্ষা বিভাগে এই ক্ষেত্ৰত কোনো ব্যৱস্থা গ্ৰহণ নকৰাত ক্ষোভিত হৈ পৰে আৰু বিদ্যালয়খনত অভিভাৱক আৰু স্থানীয় ৰাইজ উপস্থিত হৈ শিক্ষক নিযুক্তিৰ দাবীত পৰিস্থিতি উত্তপ্ত কৰি তোলে ।
