নেশ্যনেল ডেস্ক,২৫ জুন : মুম্বাইৰ ৰাজপথত লোমহৰ্ষক ঘটনা । ২২ বছৰীয়া এগৰাকী যুৱতীক চুৰি আৰু ব্লেডেৰে আক্ৰমণ একাংশ লোকৰ । গুৰুতৰভাৱে আঘাতপ্ৰাপ্ত যুৱতীগৰাকী ।
জানিব পৰা মতে মুম্বাইৰ চাৰ্ণি ৰোডত এই ভয়ংকৰ ঘটনাটো সংঘটিত হৈছে । চি.পি. টেংকৰ চিক্কা নগৰত ভাতৃৰ সৈতে পথৰ কুকুৰক খাদ্য বিতৰণ কৰি আছিল যুৱতীগৰাকী । সেই সময়তে পুৰুষৰ এটা দলে আহি যুৱতীগৰাকী আৰু তেওঁৰ ভাতৃক চুৰি আৰু ব্লেডেৰে উপৰ্যুপৰি আক্ৰমণ কৰে । এই আক্ৰমণত প্ৰচুৰ ৰক্তক্ষৰণ হয় যুৱতীগৰাকীৰ । লগে লগে তেওঁক ওচৰৰ হাস্পতাললৈ প্ৰেৰণ কৰা হয় । যুৱতীগৰাকীৰ ভাতৃও সামান্য আঘাতপ্ৰাপ্ত হয় । ইফালে ঘটনাৰ খবৰ পোৱাৰ লগে লগে আৰক্ষীৰ এটা দল ঘটনাস্থলীত উপস্থিত হয় ।
উল্লেখ্য যে অঞ্চলটোৰ পথৰ কুকুৰবোৰৰ বাবে প্ৰায়ে খাদ্যৰ যোগান ধৰে যুৱতীগৰাকী আৰু তেওঁৰ ভাতৃয়ে । কিন্তু ঘটনাৰ অভিযুক্তজনে তেওঁলোকক এনে নকৰিবলৈ সকীয়াই দি আহিছিল । অভিযুক্তজনে দুয়োকে পূৰ্বেও হাৰাশাস্তি কৰিছিল বুলি স্থানীয় একাংশ লোকে অভিযোগ কৰিছে । ইফালে অভিযুক্তজনে যুৱতীগৰাকীক অপমানজনক মন্তব্যও কৰিছিল আৰু কুকুৰক খাদ্য খুওৱাৰ বাবে ভাতৃ-ভগ্নীক ভাবুকিও দিছিল ।
জানিব পৰা মতে জে.জে. চিকিৎসালয়ত যুৱতীগৰাকীৰ চিকিৎসা কৰা হৈছে । যুৱতীগৰাকীয়ে হাতৰ কেইবাটাও স্থানত আঘাত পাইছে । যাৰ বাবে প্ৰায় ৪৬ টাতকৈও অধিক চিলাই পৰিল যুৱতীগৰাকীৰ হাতত । তেওঁৰ ১৪ বছৰীয়া ভাতৃও ঘটনাটোত আঘাতপ্ৰাপ্ত হয় ।
উল্লেখ্য যে ঘটনাটো সংঘটিত হোৱাৰ পাছতে জাষ্ট স্মাইল চেৰিটেবল ট্ৰাষ্ট নামৰ এটা সংস্থাৰ সদস্যসকল ঘটনাস্থলীত উপস্থিত হয় আৰু যুৱতীগৰাকীক জে.জে চিকিৎসালয়লৈ প্ৰেৰণ কৰাত সহায় কৰে । আনহাতে সংস্থাটোৰ সদস্যসকলে পিছদিনা পুৱা যুৱতীগৰাকীৰ সৈতে আৰক্ষী চকীলৈ যায় আৰু এজাহাৰো দাখিল কৰে ।
ঘটনাৰ তদন্ত কৰি থকা আৰক্ষীয়ে আক্ৰমণকাৰীকেইটা ক্ৰমে ৰাজকুমাৰ মিশ্ৰ, ৰিতিকা মিশ্ৰ আৰু ৰাজেশ মিশ্ৰ বুলি চিনাক্ত কৰিছে । আটাইকেইজনে যুৱতীগৰাকীৰ চুবুৰীয়া বুলি জানিব পৰা গৈছে । অভিযোগ অনুসৰি এই আক্ৰমণৰ কেইদিনমান পূৰ্বে যুৱতীগৰাকীৰ ১৪ বছৰীয়া ভাতৃক অভিযুক্তকেইজনে আক্ৰমণ কৰিছিল । বিষয়টো সন্দৰ্ভত ভিপি নগৰ আৰক্ষী থানাত এক অভিযোগো দাখিল কৰা হৈছিল । আক্ৰমণকাৰীকেইজনলৈ সতৰ্কবাণীও জাৰি কৰা হৈছিল । আৰক্ষীয়ে উল্লেখ কৰা মতে ঘটনাটো সন্দৰ্ভত তেওঁলোকে অনুসন্ধান কৰি আছে ।
লগতে পঢ়ক :Minor Raped and pregnant: 17 বছৰীয়া কিশোৰীক ধৰ্ষণ কৰি অন্তঃসত্বা, পিতৃ আৰু চুবুৰীয়াক গ্ৰেপ্তাৰ
