নেশ্যনেল ডেস্ক,৫ মে' : পাকিস্তানী সন্ত্ৰাসবাদী ভাবুকিৰ প্ৰতি পুনৰ উদ্বিগ্ন ভাৰতৰ বৈদেশিক পৰিক্ৰমা মন্ত্ৰী এছ জয়শংকৰ (Cross border terrorism)। এইবাৰ ছাংহাই সহযোগিতা সংস্থাৰ বৈঠকত (Shanghai Cooperation Organisation) পাকিস্তানক লক্ষ্য কৰি সীমান্তৰ সিপাৰৰ সন্ত্ৰাসবাদক লৈ উদ্বেগ প্ৰকাশ কৰে মন্ত্ৰীগৰাকীয়ে । শুকুৰবাৰে গোৱাত চলি থকা এছচিঅ'ৰ বৈদেশিক মন্ত্ৰীসকলৰ বৈঠকত পাকিস্তানৰ ওপৰত প্ৰচ্ছন্ন আক্ৰমণ কৰে মন্ত্ৰীগৰাকীয়ে । এছচিঅ' সন্মিলনৰ দ্বিতীয় আৰু সমাপ্তিৰ দিনটোত তেওঁ ভাষণ প্ৰদান কৰি সন্ত্ৰাসবাদৰ কাৰ্যকলাপ অব্যাহত আছে বুলি উল্লেখ কৰে ।
তেওঁ উল্লেখ কৰা মতে সন্ত্ৰাসবাদৰ কোনো স্থান নাই (India EAM on cross border terrorism)। সীমান্তৰ সিপাৰ সন্ত্ৰাসবাদকে ধৰি সকলো ধৰণৰ সন্ত্ৰাসবাদ বন্ধ কৰিব লাগে বুলিও তেওঁ দাবী কৰে । তেওঁৰ মতে সন্ত্ৰাসবাদৰ বিৰুদ্ধে যুঁজ দিয়াটো এছচিঅ'ৰ অন্যতম কৰ্তব্য । পাকিস্তানৰ বৈদেশিক মন্ত্ৰীৰ সন্মুখতে এই মন্তব্য কৰে ভাৰতৰ বৈদেশিক মন্ত্ৰী এছ জয়শংকৰে । জয়শংকৰে লগতে কয় যে এছচিঅ'ৰ অধ্যক্ষ হিচাপে ভাৰতে এছচিঅ' পৰ্যবেক্ষক আৰু সংলাপ অংশীদাৰসকলৰ সৈতে ১৪ টাতকৈও অধিক সামাজিক-সাংস্কৃতিক অনুষ্ঠানত অংশগ্ৰহণ কৰিবলৈ আমন্ত্ৰণ জনাই এক অভূতপূৰ্ব সঁহাৰি লাভ কৰিছে ।
ভাষণ প্ৰসংগত বৈদেশিক পৰিক্ৰমা মন্ত্ৰীগৰাকীয়ে কয় যে ভাৰতে এছচিঅ'ত বহুমুখী সহযোগিতাৰ বিকাশ আৰু শান্তি, স্থিৰতা, অৰ্থনৈতিক বিকাশ, সমৃদ্ধি আৰু জনসাধাৰণৰ মাজত ঘনিষ্ঠ বাৰ্তালাপৰ প্ৰসাৰক যথেষ্ট গুৰুত্ব দিয়ে ।
মন্ত্ৰীগৰাকীয়ে কয় যে ভাৰতৰ প্ৰথম এছচিঅ'ৰ অধ্যক্ষ হিচাপে ভাৰতে ১৫ খন মন্ত্ৰী পৰ্যায়ৰ বৈঠককে ধৰি ১০০ খনতকৈও অধিক বৈঠক আৰু অনুষ্ঠান সফলতাৰে সমাপ্ত কৰিছে আৰু ভাৰতে এই ক্ষেত্ৰত এছচিঅ'ৰ সদস্য ৰাষ্ট্ৰ, পৰ্যবেক্ষক আৰু অংশীদাৰসকলৰ পৰাও সঁহাৰি লাভ কৰিছে । জয়শংকৰে কয় যে এছচিঅ'ৰ ইতিহাসত প্ৰথমবাৰৰ বাবে এছচিঅ' মিলেট খাদ্য মহোৎসৱ, চলচ্চিত্ৰ মহোৎসৱ, সুৰজকুম্ভ মেলাত সাংস্কৃতিক প্ৰদৰ্শন, এছচিঅ' পৰ্যটন মাৰ্টৰ দৰে অনুষ্ঠানসমূহ ভাৰতে সফলতাৰে আয়োজন হৈছে (SCO Foreign Ministers meeting in Goa)।
মন্ত্ৰীগৰাকীৰ মতে প্ৰথম সাংস্কৃতিক আৰু পৰ্যটন ৰাজধানী হিচাপে বাৰাণসীয়ে সদস্য ৰাষ্ট্ৰসমূহৰ সক্ৰিয় অংশগ্ৰহণেৰে কেইবাটাও ৰঙীন অনুষ্ঠান আয়োজন কৰিছে ।
জয়শংকৰৰ মতে ক'ভিড আৰু ভূ-ৰাজনৈতিক উত্থান-পতনৰ ফলস্বৰূপে বিশ্বই বহুতো প্ৰত্যাহ্বানৰ সন্মুখীন হৈছে । এই ঘটনাবোৰে বিশ্বব্যাপী যোগান শৃংখলা ব্যাহত কৰিছে, যাৰ ফলত শক্তি, খাদ্য আৰু সাৰৰ যোগানৰ ওপৰত গুৰুতৰ প্ৰভাৱ পৰিছে আৰু উন্নয়নশীল ৰাষ্ট্ৰসমূহৰ ওপৰত ব্যাপক প্ৰভাৱ পৰিছে । এই প্ৰত্যাহ্বানবোৰ এছচিঅ'ৰ সদস্য ৰাষ্ট্ৰসমূহৰ বাবেও এক সুযোগ যিয়ে তেওঁলোকক সামূহিকভাৱে সহযোগিতা আৰু সমাধান কৰিব পাৰে বুলি তেওঁ উল্লেখ কৰে ।
আফগানিস্তানৰ বৰ্তমানৰ পৰিস্থিতি সম্পৰ্কে তেওঁ কয় যে আফগানিস্তানৰ পৰিস্থিতি এছচিঅ'ৰ মনোযোগৰ কেন্দ্ৰবিন্দু হৈ আছে । আফগানি জনসাধাৰণৰ কল্যাণৰ দিশত বিশ্বৰ প্ৰচেষ্টা থাকিব লাগে । জয়শংকৰে কয় যে ভাৰতে বিশ্বব্যাপী প্ৰত্যাহ্বানৰ মোকাবিলা কৰিবলৈ সদায় বহুপাক্ষিক দৃষ্টিভংগীৰ পক্ষত থিয় দি আহিছে আৰু দক্ষতা আৰু অভিজ্ঞতা ভাগ বতৰা কৰাত সদায় ইচ্ছুক অংশীদাৰ হৈ আহিছে । তেওঁ কয় যে ষ্টাৰ্টআপ আৰু উদ্ভাৱনৰ ক্ষেত্ৰত ভাৰতৰ নিজৰ সাফল্য এক উল্লেখযোগ্য যাত্ৰা । তেওঁ উল্লেখ কৰা মতে ভাৰতে সদস্য ৰাষ্ট্ৰসমূহৰ সৈতে অভিজ্ঞতা ভাগ বতৰা কৰিবলৈ সাজু আছে ।
মন্ত্ৰী জয়শংকৰৰ মতে এছচিঅ'ই তিনিটা দশক অতিক্ৰম কৰিলে আৰু দ্ৰুতগতিত পৰিৱৰ্তনশীল পৃথিৱীত সংগঠনটোক প্ৰাসংগিক কৰি ৰখাৰ বাবে ইয়াৰ সংস্কাৰ আৰু আধুনিকীকৰণৰ বাবে এক উপযুক্ত সময় । জয়শংকৰে কয় যে এছচিঅ'ৰ ৪ সদস্য হিচাপে ইৰাণ আৰু বেলাৰুছৰ অন্তৰ্ভুক্তিৰ চলিত প্ৰক্ৰিয়াৰ অগ্ৰগতি লক্ষ্য কৰি তেওঁ সুখী আৰু সেই দিশত তেওঁলোকৰ প্ৰচেষ্টাৰ বাবে সচিবালয়ক ধন্যবাদ জ্ঞাপন কৰে ।
গোৱাত অনুষ্ঠিত এছচিঅ'ৰ বৈদেশিক মন্ত্ৰীসকলৰ সন্মিলনৰ দ্বিতীয় দিনা মন্ত্ৰী এছ জয়শংকৰে বিভিন্ন দেশৰ বৈদেশিক মন্ত্ৰীসকলক আদৰণি জনায় । বৈদেশিক মন্ত্ৰী এছ জয়শংকৰে গোৱাত এছচিঅ'ৰ বৈদেশিক মন্ত্ৰী পৰিষদৰ বৈঠকৰ বাবে চীনৰ বৈদেশিক মন্ত্ৰী কিন গেং, ৰাছিয়াৰ বৈদেশিক মন্ত্ৰী চাৰ্গেই লাভৰভ, পাকিস্তানৰ বৈদেশিক মন্ত্ৰী বিলাৱাল ভুট্টো জাৰ্দাৰীৰ উপৰিও কিৰগিজস্তান, কাজাখাস্তান, উজবেকিস্তান আৰু তাজিকিস্তানৰ বৈদেশিক মন্ত্ৰীসকলক আদৰণি জনায় ।
লগতে পঢ়ক :Suvendu Adhiakri convoy accident : বিজেপি নেতাৰ কয়ভয়ৰ খুন্দাত যুৱকৰ মৃত্যু !
