নিউজ ডেস্ক, ১৬ আগষ্ট: বিহাৰৰ মহিলা কনিষ্টবলৰ ভিডিঅ’ ভাইৰেল কৰি বিপদত আৰক্ষী জোৱান ৷ বিহাৰৰ ৰোহতাছত সংঘটিত হৈছে এই ঘটনা ৷ মহিলা কনিষ্টবলগৰাকীয়ে গা ধোৱাৰ সময়ত সহকৰ্মী আৰক্ষী জোৱানজনে ভিডিঅ’ বনাই ভাইৰেল কৰে ৷ পাচত সমগ্ৰ বিষয়টো সন্দৰ্ভত মহিলা আৰক্ষী থানাত এজাহাৰ দাখিল কৰে ভুক্তভোগী মহিলা কনিষ্টবলগৰাকীয়ে । ইয়াৰ পিছতে আৰক্ষী বিভাগত সৃষ্টি হয় তীব্ৰ চাঞ্চল্যৰ ।
ইফালে ঘটনাৰ সন্দৰ্ভত তথ্য লাভ কৰাৰ পাচতেই আৰক্ষীয়ে তদন্ত কৰি অভিযুক্ত আৰক্ষী জোৱানজনক নিলম্বন কৰে । ভুক্তভোগী কনিষ্টবলগৰাকীৰ বক্তব্যও ৰেকৰ্ড কৰিছে এছ আই টিয়ে । তথ্য অনুসৰি, দৰছাল ডেহৰী আৰক্ষী লাইনত প্ৰশিক্ষণৰ সময়ত সংঘটিত হয় এই অনাকাংক্ষিত ঘটনা ৷ প্ৰশিক্ষাৰ্থী পিটিচি সুধাংশু শেখৰে মহিলা কনিষ্টবলৰ অশ্লীল ভিডিঅ’ বনাইছিল ৷ পিচত মহিলা কনিষ্টবলগৰাকীয়ে ডেহৰী মহিলা আৰক্ষী থানাত এই সন্দৰ্ভত এজাহাৰ দাখিল কৰে ৷
মহিলা থানাত দিয়া এজাহাৰত ভুক্তভোগী মহিলা কনিষ্টবলগৰাকীয়ে আৰক্ষী কেন্দ্ৰ ডেহৰীত অৱস্থিত মহিলা গা ধোৱা ঘৰত এই ঘটনা সংঘটিত হোৱাৰ কথা উল্লেখ কৰিছে ৷ তেওঁ এই কথা জানিব পাৰি চিঞৰ-বাখৰ কৰাত অভিযুক্ত সুধাংশুৱে পলায়ন কৰাৰ কথাও উল্লেখ কৰে ৷
ইফালে এই ঘটনাৰ তথ্য লাভ কৰাৰ পাচতেই আৰক্ষী অধীক্ষক বিনীত কুমাৰে ঘটনাৰ তদন্তৰ বাবে মহিলা আৰক্ষী থানাৰ মুৰব্বী লক্ষ্মী পেটেলৰ নেতৃত্বত এছ আই টি গঠন কৰিছে । অভিযুক্ত কনিষ্টবল সুধাংশু পূৰ্বে বিক্ৰমগঞ্জৰ এছ ডি পি অ’ৰ দেহৰক্ষী হিচাপে কৰ্মৰত আছিল । সমগ্ৰ ঘটনা সন্দৰ্ভত সম্প্ৰতি তদন্ত অব্যাহত ৰাখিছে তদন্তকাৰী দলে । ঘটনাটো চৰ্চালৈ অহাৰ পিছতে আৰক্ষী বিভাগত তীব্ৰ চাঞ্চল্যৰ সৃষ্টি হৈছে ।
লগতে পঢ়ক: Double murder: পত্নী আৰু কণমানি কন্যাক কুঠাৰেৰে ঘপিয়াই হত্যা
