নেশ্যনেল ডেস্ক, 12 এপ্ৰিল : ত্ৰিপুৰাৰ এখন সমবায় সমিতিয়ে ঘৰুৱাভাৱে উৎপাদন কৰা চাহ এইবাৰ ৰপ্তানি কৰা হ'ব ডেনমাৰ্কলৈ ৷ ত্ৰিপুৰাৰ চাহ সংগ্ৰাহক আৰু চাহ উন্নয়ন নিগম পৰিষদৰ সঞ্চালক সদস্য দিগন্ত বৰ্মনে জনোৱা মতে, অমৃতসৰৰ এটা কোম্পানীৰ জৰিয়তে ঘৰুৱাভাৱে উৎপাদন কৰা চাহ ডেনমাৰ্কলৈ পঠোৱা হ'ব ৷ ইতিমধ্যে কোম্পানীটোৱে ত্ৰিপুৰাৰ পৰা চাহ ক্ৰয় আৰম্ভ কৰিছে ৷
দীৰ্ঘদিনৰ পৰা টি ব'ৰ্ড ইণ্ডিয়াৰ হৈ কাম কৰা বৰ্মনে কয়, ত্ৰিপুৰাৰ এই বিশেষ চাহে ৰাষ্ট্ৰীয় তথা আন্তঃৰাষ্ট্ৰীয় বজাৰ দখল কৰিবলৈ সক্ষম হ'ব ৷ বিশেষ সোৱাদ যুক্ত আৰু অন্যান্য ঔষধি গুনেৰে ভৰপুৰ এই চাহে ত্ৰিপুৰাৰ বজাৰ দখল কৰিবলৈ সক্ষম হৈছে ৷
লগতে বৰ্মনে কয়, ইতিমধ্যে এই চাহে সৰ্বাধিক মূল্য 10,000 ৰ পৰা 12,000 টকালৈ বৃদ্ধি হৈছে ৷ একচেটীয়া ভাৱে ত্ৰিপুৰাৰ উনাকোটি জিলাৰ অন্তৰ্গত পঞ্চম নগৰত থকা চৰকাৰী চাহ উৎপাদন কেন্দ্ৰটো বন্ধ হৈ যোৱাৰ পাচতে এই কেন্দ্ৰটো সমবায় সমিতি খনে ব্যৱহাৰ কৰি এই চাহবিধ প্ৰস্তুত কৰিছে ৷ উন্নত মানদণ্ডৰ এই চাহবিধক সমবায়খনে নীৰমহল চাহ ব্ৰেণ্ড নামেৰে নামাকৰণ কৰিছে ৷
উল্লেখ্য যে, এই চাহবিধৰ প্ৰস্তুত প্ৰণালী অসমৰ চাহ প্ৰস্তুত প্ৰণালীতকৈ কিছু পৃথক ৷ গছৰ পৰা কোমল চাহপাত চিঙি অনাৰ পাচত ৰ'দত শুকুৱাই হাতেৰে মোহাৰি মোহাৰি ইয়াক প্ৰস্তুত কৰা হয় ৷ অমৃতসৰস্থিত শ্বাহজাদা এক্সপোৰ্ট লিমিটেড নামৰ কোম্পানীটোৱে প্ৰথমে 65,000 টকা প্ৰতি পাঁচ কেজি মূল্যত চাহ ক্ৰয় কৰাৰ পাচতে এই চাহে ইউৰোপ আৰু উপসাগৰীয় দেশসমূহৰ বজাৰো দখল কৰিবলৈ সক্ষম হৈছে ৷
লগতে পঢ়ক: বাফটা এৱাৰ্ড 2021: বঁটা বিজয়ীসকলৰ সম্পূৰ্ণ তালিকা
