নেশ্যনেল ডেস্ক,৬ এপ্ৰিল: ত্ৰিপুৰাৰ জনজাতীয় পৰিষদৰ নিৰ্বাচনৰ মাজতে ৰাজ্যখনত কেইবাটাও বিক্ষিপ্ত ঘটনা সংঘটিত হয় । জানিব পৰা মতে, আমতালী-গোলাঘাটি এডিচি সমষ্টিৰ অন্তৰ্গত ধাৰিয়াতাল এডিচি গাঁৱত উত্তেজনাই বিৰাজ কৰে । একাংশ দুৰ্বৃত্তই ভোটকেন্দ্ৰ লণ্ড-ভণ্ড কৰাৰ পিছতে তীব্ৰ চাঞ্চল্যই বিৰাজ কৰে । আনকি দুৰ্বৃত্তৰ দলটোৱে ভোটকেন্দ্ৰটোৰ দুৱাৰ-খিৰিকী ভাঙি পেলায় । আৰক্ষী উপস্থিত হৈ ঘটনা নিয়ন্ত্ৰণৰ বাবে শূন্যলৈ গুলীচালনা কৰিবলগীয়া হয় ৷
আগৰতলা চহৰৰ বোধজংনগৰ-ৱাকি নগৰ সমষ্টিত উত্তেজনাৰ মাজতে বিষয়াসকলে ভোটকেন্দ্ৰৰ দুৱাৰ বন্ধ কৰিবলগীয়া পৰিৱেশৰ সৃষ্টি হয় । দুৰ্বৃত্তই ভোটকেন্দ্ৰ দখল কৰিবলৈ চেষ্টা কৰাত ভোটদান বন্ধ কৰিবলগীয়া হয় । পৰ্যাপ্ত পৰিমাণৰ আৰক্ষীৰ উপস্থিতিত পুনৰ ভোটদান প্ৰক্ৰিয়া আৰম্ভ কৰা হয় ।
আনহাতে, মহাৰাণী-চেলাগাং সমষ্টিত একাংশ লোকৰ ভয়-ভাবুকিত ভোট বৰ্জন কৰে স্থানীয় লোকসকলে । অঞ্চলটোৰ মহিলাসকলে একাংশ ভাবুকি দিয়া লোকক খেদি পঠিয়ায় । অৱশ্যে আৰক্ষীৰ উপস্থিতিত পুনৰ শান্ত হয় ভোটকেন্দ্ৰটো ।
ইয়াৰ মাজতে খোৱাই জিলাৰ অন্তৰ্গত ৰামচন্দ্ৰঘাট সমষ্টিত স্থানীয় লোকে ইভিএমত টিআইপিআৰএ মোথা পাৰ্টিৰ প্ৰতীক দেখা নাপাই হুলস্থুল পৰিৱেশৰ সৃষ্টি কৰে । কিছু সময়ৰ বাবে ভোটদান প্ৰক্ৰিয়া বন্ধ কৰা হয় যদিও পিছত পুনৰ আৰম্ভ হয় । অৱশ্যে টিআইপিআৰএ মোথা পাৰ্টিৰ প্ৰতীকত বগা কাগজ লগোৱা আছিল, যাৰ বাবে অস্পষ্ট আছিল প্ৰতীকটো ।
লেম্বুচেৰাতো একাংশ দুৰ্বৃত্তই ভোটদানৰ বাবে ভোটাৰসকলক বাধা দিয়ে । দক্ষিণ ত্ৰিপুৰাত একাংশ আইপিএফটিৰ কৰ্মীক নিৰ্দয়ভাৱে প্ৰহাৰ কৰা হয় । সমান্তৰালকৈ স্থানীয় মণ্ডল সভাপতিৰ কনভয়ত দুৰ্বৃত্তই আক্ৰমণ কৰাৰ পিছত বেলোনিয়াত এজন লোক গুৰুতৰভাৱে আহত হয় । চৰকাৰী সূত্ৰ অনুসৰি, ইভিএম বিকল হোৱাৰ খবৰো পোৱা গৈছিল আৰু ইয়াৰ বেছিভাগেই মেৰামতি কৰি থকা গৈছে ৷ ৰাজ্যিক নিৰ্বাচনী আয়োগৰ সূত্ৰ অনুসৰি, ভোটৰ শতাংশ সম্পৰ্কে ইচিয়ে এতিয়ালৈকে কোনো প্ৰতিবেদন লাভ কৰা নাই । কিন্তু ৰাজনৈতিক দলসমূহৰ সূত্ৰই দাবী কৰা মতে, আবেলি ২.৩০ বজালৈ প্ৰায় ৭০ শতাংশ ভোটদান সমাপ্ত হৈছে ।
লগতে পঢ়ক: ক’ভিড-19 সম্পৰ্কীয় উৰাবাতৰি নাকচ বিশ্ব স্বাস্থ্য সংস্থাৰ
