নেশ্যনেল ডেস্ক, ৪ ফেব্ৰুৱাৰী: ত্ৰিপুৰাৰ ছেপাহিজালা জিলাৰ পঞ্চায়ত কাৰ্যালয়ৰ অব্যৱহৃত কোঠাসমূহ পুথিভঁৰাল হিচাপে গঢ়ি তোলা হৈছে । বৃহস্পতিবাৰে এক প্ৰশিক্ষণ কাৰ্যসূচীত ত্ৰিপুৰাৰ উচ্চ শিক্ষাৰ সঞ্চালক ছাজু ৱাহিদে কয় যে, ছেপাহিজালা জিলাৰ ১৬৯টা নতুন পুথিভঁৰালক গ্ৰন্থ যোগানৰ ক্ষেত্ৰত তেওঁ সহায় কৰিব ।
বীৰ চন্দ্ৰ কেন্দ্ৰীয় পুথিভঁৰাল কৰ্তৃপক্ষই দণ্ডাধীশৰ কাৰ্যালয়ৰ সহযোগত পুথিভঁৰালবোৰক গ্ৰন্থৰ যোগান ধৰিব । অনাগত দিনত পুথিভঁৰাললৈ আহি যাতে পাঠক নিৰাশ হ'বলগীয়া নহয় আৰু পুথিভঁৰাললৈ যাতে অধিক সংখ্যক পাঠকৰ আগমণ ঘটে তাৰ বাবে এই পদক্ষেপ গ্ৰহণ কৰা হৈছে বুলি মন্তব্য কৰে শিক্ষা বিষয়াগৰাকীয়ে ।
তেওঁ লগতে কয় যে, এতিয়া পুথিভঁৰালৰ অৰ্থ সলনি হৈছে আৰু মানুহে আঙুলি মূৰতে সকলো উপলব্ধ হোৱাতো বিচাৰে । ছাজু ৱাহিদে কয় যে, পুথিভঁৰাল নিৰ্মাণৰ বাবে পুঁজিৰ অভাৱ নাই । কিন্তু সকলোৰে বাবে পুথিভঁৰাললৈ আহি কিতাপ পঢ়াৰ সুবিধা উপলব্ধ কৰোৱাতোহে জটিল ।
সেয়েহে এতিয়া অনলাইযোগে পুথিভঁৰালৰ গ্ৰন্থ পঢ়াৰো ব্যৱস্থা কৰা হৈছে বুলি মন্তব্য কৰে শিক্ষা বিষয়াগৰাকীয়ে । উচ্চ শিক্ষা বিভাগে বীৰ চন্দ্ৰ কেন্দ্ৰীয় পুথিভঁৰালত ই-গ্ৰন্থালয় ব্যৱস্থা স্থাপনৰ নিৰ্দেশ দিছে ।
বৃহস্পতিবাৰে এই অনুষ্ঠানত উপস্থিত থাকি ত্ৰিপুৰাৰ উচ্চ শিক্ষা পৰিষদৰ চেয়াৰমেন অৰুণোদয় ছাহা আৰু বীৰ চন্দ্ৰ কেন্দ্ৰীয় পুথিভঁৰালৰ কৰ্মচাৰীসকল উপস্থিত থাকে ।
