নিউজ ডেস্ক, ১৪ জুন : তামিলনাডুৰ বিদ্যুৎ মন্ত্ৰী চেন্থিল বালাজীক চিকিৎসা কৰি থকা চিকিৎসকসকলে বুধবাৰে হৃদযন্ত্ৰৰ ৰক্তনলীত চিনাক্ত কৰা ব্লকবোৰ আঁতৰাবলৈ বাইপাছ অস্ত্ৰোপচাৰৰ পৰামৰ্শ দিছে । উল্লেখ্য যে চেন্থিল বালাজীক ইয়াৰ পূৰ্বে প্ৰৱৰ্তন সঞ্চালকালয়ৰ (ইডি) বিষয়াসকলে ঘোচ লৈ চাকৰি দিয়া কেলেংকাৰী সন্দৰ্ভত গ্ৰেপ্তাৰ কৰিছিল ।
তামিলনাডুৰ বিদ্যুৎ মন্ত্ৰী ভি চেন্থিল বালাজীক বুধবাৰে পুৱতি নিশা ৰাজ্যখনৰ ৰাজধানীৰ এখন চৰকাৰী চিকিৎসালয়ত ভৰ্তি কৰোৱা হয় । তেওঁৰ স্বাস্থ্যৰ অৱস্থাৰ অৱনতি ঘটাৰ বাবে তেওঁক চিকিৎসালয়ত ভৰ্তি কৰোৱা হয় । উল্লেখ্য যে ইডিয়ে মঙলবাৰে পুৱা ৭ বজাৰ পৰা প্ৰায় ১৮ ঘণ্টা ধৰি চলা অভিযানৰ পিছত তেওঁক গ্ৰেপ্তাৰ কৰিছিল ।
আনহাতে, চৰকাৰী সূত্ৰই প্ৰকাশ কৰা মতে, চেন্থিল বালাজীক প্ৰায় ১৮ ঘণ্টা ধৰি কৰা সোধা-পোছাৰ অন্তত ধন আত্মসাৎ প্ৰতিৰোধ আইনৰ (পিএমএলএ) ধাৰাৰ অধীনত দাখিল কৰা এটা গোচৰত গ্ৰেপ্তাৰ কৰা হয় । এই গোচৰটো মন্ত্ৰীজনে কৰা প্ৰৱঞ্চনাৰ অভিযোগৰ সৈতে সম্পৰ্কিত । অভিযোগ মতে, পূৰ্বৰ এআইএডিএমকে শাসনকালত পৰিবহণ মন্ত্ৰালয়ৰ দায়িত্বত থকাৰ সময়ত ধনৰ বিনিময়ত চাকৰি প্ৰদান কৰিছিল চেন্থিলে ।
