নেশ্যনেল ডেস্ক, ১৪ আগষ্ট : নতুন দিল্লীত চিলনী চোৰৰ সন্ত্ৰাস বৃদ্ধি পাইছে । এইবাৰ চিলনী চোৰৰ আক্ৰমণত গুৰুতৰভাৱে আহত হয় এগৰাকী শিক্ষয়িত্ৰী । হাস্পতালত ভৰ্তি শিক্ষয়িত্ৰীগৰাকী ।
উল্লেখ্য যে ৰাজধানী চহৰ দিল্লীত চুৰি, ডকাইতিৰ দৰে অপৰাধজনিত ঘটনা ক্ৰমাৎ বৃদ্ধি হোৱাৰ অভিযোগ উঠিছে । ইয়াৰ মাজতে শুকুৰবাৰে দিল্লীৰ এখন প্ৰতিষ্ঠিত বিদ্যালয়ৰ শিক্ষয়িত্ৰীৰ হাতত পৰা ফোন কাঢ়ি নিয়াৰ চেষ্টা কৰে এটা চিলনী চোৰৰ দলে । ফলত অটো ৰিক্সাৰ পৰা বাগৰি পৰে শিক্ষয়িত্ৰীগৰাকী । কেৱল এয়াই নহয় বাইকত অহা তিনি দুৰ্বৃত্তই শিক্ষয়িত্ৰীগৰাকীক ৰাস্তাৰে চোঁচৰাই লৈ যায় । ফলত শিক্ষয়িত্ৰীগৰাকী গুৰুতৰভাৱে আহত হয় ।
জানিব পৰা মতে ১১ আগষ্টৰ আবেলি প্ৰায় ৩.২৩ বজাত ঘটনাটো সংঘটিত হয় । চাকেত আৰক্ষী থানাত এই ঘটনা সন্দৰ্ভত আৰক্ষী নিয়ন্ত্ৰণ কক্ষলৈ এটা ফোন আহে । আৰক্ষী সূত্ৰই জনোৱা মতে অচিনাক্ত দুৰ্বৃত্তৰ দলটোৱে ভুক্তভোগী মহিলাগৰাকীৰ হাতৰ পৰা এটা আইফোন কাঢ়ি নিবলৈ চেষ্টা কৰি থকা অৱস্থাত দুৰ্ঘটনাটো সংঘটিত হয় ।
জৱাহৰ পাৰ্ক অঞ্চলৰ বাসিন্দা যোভিকা চৌধুৰী নামৰ জ্ঞান ভাৰতী বিদ্যালয়ৰ শিক্ষয়িত্ৰীগৰাকীয়ে এখন অটো-ৰিক্সাৰে ঘৰলৈ যাত্ৰা কৰি আছিল । যেতিয়া তেওঁ চাকেতৰ খোকা মাৰ্কেটৰ ওচৰ পাইছিল তিনি অচিনাক্ত দুৰ্বৃত্তই হঠাতে তেওঁৰ ওচৰলৈ আহে আৰু হাতৰ পৰা মোবাইল ফোনটো কাঢ়ি নিয়াৰ চেষ্টা কৰে । ফলত শিক্ষয়িত্ৰীগৰাকী অটোৰ পৰা পৰি যায় আৰু আঘাতপ্ৰাপ্ত হয় ।
আঘাতপ্ৰাপ্ত শিক্ষয়িত্ৰীগৰাকীক লগে লগে চাকেতৰ মেক্স চিকিৎসালয়ত ভৰ্তি কৰোৱা হয় । আৰক্ষীয়ে ঘটনা সন্দৰ্ভত এটা গোচৰ ৰুজু কৰিছে আৰু দুৰ্বৃত্তকেইটাৰ বিৰুদ্ধে অভিযান আৰম্ভ কৰিছে । আৰক্ষীয়ে জনোৱা মতে অপৰাধীকেইটাক চিনাক্ত কৰিবলৈ আৰু তেওঁলোকক আটক কৰিবলৈ অঞ্চলটোৰ চিচিটিভি কেমেৰাবোৰৰ ফুটেজ সংগ্ৰহ কৰা হৈছে । ইফালে ঘটনাটোৱে ৰাজধানী চহৰৰ বাসিন্দাসকলৰ মাজত তীব্ৰ প্ৰতিক্ৰিয়াৰ সৃষ্টি কৰিছে ।
লগতে পঢ়ক :Pakistani intruder shot dead : পুনৰ বিএছএফৰ গুলীত নিহত পাকিস্তানী অনুপ্ৰৱেশকাৰী
