নেশ্যনেল ডেস্ক,৩০ জুন : তামিলনাডুৰ মন্ত্ৰী ভি চেন্থিল বালাজীৰ বৰ্খাস্তক লৈ বিতৰ্ক অব্যাহত আছে । নিযুক্তি কেলেংকাৰীত ইডিয়ে গ্ৰেপ্তাৰ কৰা মন্ত্ৰীগৰাকীক প্ৰথমে ৰাজ্যপাল আৰ এন ৰবিয়ে বৰ্খাস্তৰ ঘোষণা কৰিছিল । মুখ্যমন্ত্ৰী এম কে ষ্টেলিনক সহকৰ্মীক বৰ্খাস্তৰ পত্ৰ প্ৰদান কৰাৰ কেইঘণ্টামানৰ পাছতে নিজৰ আদেশ স্থগিত ৰাখে ৰাজ্যপালগৰাকীয়ে । কেন্দ্ৰীয় গৃহমন্ত্ৰী অমিত শ্বাহৰ পৰামৰ্শ অনুসৰিয়ে ৰাজ্যপালে তেওঁৰ আদেশ স্থগিত ৰাখে ।
সূত্ৰৰ মতে কেন্দ্ৰীয় মন্ত্ৰীগৰাকীয়ে মুখ্যমন্ত্ৰীৰ পৰামৰ্শ অবিহনে এগৰাকী কেবিনেট মন্ত্ৰীক বৰ্খাস্ত কৰাৰ আদেশৰ সৈতে আগবাঢ়ি যোৱাৰ পূৰ্বে ৰাজ্যপালক আইনী মতামত ল'বলৈ পৰামৰ্শ দিছে ।
ৰাজ্যপাল আৰ এন ৰবিয়ে তেওঁৰ পত্ৰখনত ডি.ও. লেটাৰ নং ০০১৩/আৰ.বি.টি.এন./২০২৩-ৰ কথা উল্লেখ কৰি মন্ত্ৰী ভি চেন্থিল বালাজীৰ স্থিতি সম্পৰ্কে নিজৰ স্থিতি স্পষ্ট কৰে । তেওঁ উল্লেখ কৰা মতে এই সন্দৰ্ভত তেওঁক কেন্দ্ৰীয় গৃহ মন্ত্ৰীয়ে পৰামৰ্শ দিছে যে এটৰ্নি জেনেৰেলৰ মতামত বিচৰাটো বিচক্ষণতা হ'ব । সেই অনুসৰি, তেওঁ তেওঁৰ মতামতৰ বাবে এটৰ্নি জেনেৰেলৰ ওচৰলৈ যাব । ইফালে, মন্ত্ৰীগৰাকীক বৰ্খাস্ত কৰাৰ নিৰ্দেশটো পৰৱৰ্তী সিদ্ধান্ত নোলোৱালৈ স্থগিত ৰখা হ'ব বুলিও পত্ৰখনত ৰাজ্যপালে উল্লেখ কৰে ।
