নেশ্যনেল ডেস্ক, 4 আগষ্ট: উত্তৰাখণ্ডত সংঘটিত হৈছে ভয়ংকৰ ঘটনা ৷ কেদাৰনাথলৈ যোৱাৰ পথত পাহাৰৰ পৰা শিল বাগৰি জীৱন্তে সমাধিস্থ 20 গৰাকীলৈ লোক ৷ পাহাৰৰ পৰা প্ৰকাণ্ড শিল খহি পৰাৰ ফলত নিম্নাংশত থকা দোকানসমূহ হেঁচা মাৰি ধৰে ৷ যাৰ ফলত এই কৰুণ ঘটনা সংঘটিত হয় ৷
উল্লেখ্য যে বৃহস্পতিবাৰে নিশা বজ্ৰপাতৰ ফলত পাহাৰৰ শীৰ্ষত অৱস্থিত এটা শিলৰ এটা অংশ ভাগি পৰে ৷ আৰু সেই শিলে পাহাৰৰ তলত থকা তিনিখন দোকানক হেঁচা মাৰি ধৰে ৷ কেৱল সিমানেই নহয়, কেইবাজনো লোক শিল আৰু ভগ্ন দোকানৰ সৈতে পানীত পৰেগৈ ৷
এই ঘটনা ইমানেই ভয়ংকৰ আৰু শিহৰণকাৰী আছিল যে দোকানৰ ভিতৰত থকা কোনো লোকেই নিৰাপদ স্থানলৈ যোৱাৰো সুযোগ লাভ নকৰিলে ৷ জানিব পৰা মতে সোনপ্ৰয়াগ-গৌৰীকুণ্ড ঘাইপথৰ সমীপৱৰ্তী স্থানত সংঘটিত হয় এই ঘটনা ৷ আনহাতে সেই স্থানৰ কাষৰে বৈ গৈছে মন্দাকিনী নদী ৷ যাৰ বাবে শিলাখণ্ডৰ সৈতে একলগে নদীত পৰিল বহু কেইগৰাকী লোক ৷
আনহাতে শিলাখণ্ডৰ ওজত যথেষ্ট হোৱাৰ বাবে বহু সময় ধৰি একাংশ লোক তেনেদৰেই পৰি ৰ’ল ৷ পৰৱৰ্তী পৰ্যায়ত প্ৰশাসনৰ সহযোগত চলোৱা হয় উদ্ধাৰ অভিযান ৷ ঘটনাস্থলীৰ পৰা মুঠ 3 গৰাকী লোকৰ মৃতদেহ উদ্ধাৰ কৰে প্ৰশাসনে ৷ কিন্তু 17 গৰাকী লোকৰ সন্ধান এতিয়াও লাভ কৰিবলৈ সক্ষম হোৱা নাই প্ৰশাসনে ৷
ইফালে উদ্ধাৰ অভিযানত প্ৰশাসনে গাফিলতি কৰাৰো অভিযোগ উত্থাপন হৈছে ৷ অভিযোগ অনুসৰি ঘটনা সংঘটিত হোৱাৰ প্ৰায় 4 ঘণ্টাৰ পাচহে উদ্ধাৰ অভিযান আৰম্ভ কৰা হৈছিল ৷ সঠিক সময়ত প্ৰশাসন তৎপৰ হোৱা হ’লে কেইবাগৰাকীও লোকৰ জীৱন ৰক্ষা কৰিব পৰা গ’লহেঁতেন বুলি দাবী কৰিছে স্থানীয় লোকে ৷
স্থানীয় লোকে কয় যে বৃহস্পতিবাৰে নিশা প্ৰায় 12 বজাত এই ঘটনা সংঘটিত হৈছিল ৷ কিন্তু পুৱতি নিশা 4 বজাৰ পৰাহে উদ্ধাৰ অভিযান আৰম্ভ কৰা হৈছিল ৷ এই শোকাৱহ ঘটনাত নেপালৰ কেবাজনো লোকো নিহত হোৱা বুলি জানিব পৰা গৈছে ৷
লগতে পঢ়ক: Two girls beat up young man: যুৱতীক অনুসৰণ কৰি অশালীন ব্যৱহাৰ যুৱকৰ, ৰাজপথত চেণ্ডেলেৰে প্ৰহাৰ যুৱকক
