নিউজ ডেস্ক, 25 ডিচেম্বৰ : কি কাৰণে উত্তৰকাশীৰ নিৰ্মীয়মান ছিল্কয়াৰা বেণ্ড-বৰকোট সুৰংগত শোকাৱহ ঘটনা সংঘটিত হৈছিল ? 41 জন শ্ৰমিকে কিয় 17 দিনে সুৰংগত আবদ্ধ হৈ থাকিবলগীয়া হ’ল ? সমগ্ৰ ঘটনা সন্দৰ্ভত কেন্দ্ৰীয় পথ পৰিবহণ আৰু ঘাইপথ মন্ত্ৰালয়ক প্ৰাথমিক তদন্তৰ প্ৰতিবেদন দাখিল কৰিছে বিশেষজ্ঞৰ দলে ৷
উল্লেখ্য যে, উত্তৰকাশীৰ নিৰ্মীয়মান ছিল্কয়াৰা সুৰংগত হোৱা শোকাৱহ ঘটনাৰ সন্দৰ্ভত তদন্তৰ বাবে কেন্দ্ৰীয় চৰকাৰে গঠন কৰি দিয়া হৈছিল ছয়জনীয়া বিশেষজ্ঞৰ এটা দল ৷ ইফালে বিশেষজ্ঞৰ এটা দলটোৱে ছিল্কয়াৰাত উপস্থিত হৈছিল 13 ডিচেম্বৰত ৷ তিনিদিন ধৰি দুৰ্ঘটনাটোৰ আঁৰৰ কাৰণবোৰ পুংখানুপুংখভাৱে অনুসন্ধান কৰি দলটো 15 ডিচেম্বৰত দিল্লীলৈ উভতি গৈছিল । তাৰ পাছতে দলটোৱে ঘটনাৰ কাৰণ সন্দৰ্ভত কেইবাপৃষ্ঠাৰ এখন প্ৰতিবেদন দাখিল কৰিছে কেন্দ্ৰীয় পথ পৰিবহণ আৰু ঘাইপথ মন্ত্ৰালয়ক ৷
প্ৰতিবেদনত কোৱা হৈছে যে, সুৰংগ নিৰ্মাণকাৰী কোম্পানীটোৱে ৰাষ্ট্ৰীয় ঘাইপথ আৰু আন্তঃগাঁথনি উন্নয়ন নিগম লিমিটেড চমুকৈ এন এইচ আই ডি চি এলে নিযুক্তি দিয়া অভিযন্তাৰ পৰা অনুমতি লাভ কৰা নাছিল । সুৰংগটোৰ ভিতৰত চেন্সৰ আৰু সঁজুলিৰ অভাৱো আছিল । যাৰ ফলত প্ৰয়োজনীয় সাৱধানতা অৱলম্বনত বাধাৰ সৃষ্টি হৈছিল ।
তদুপৰিও এন এইচ আই ডি চি এলৰ বিষয়াসকলে সুৰংগ নিৰ্মাণ কাৰ্যৰ বাবে প্ৰয়োজনীয় বিষয়ৰ সন্দৰ্ভত কোনো নিৰীক্ষণ কৰা নাছিল ৷ যাৰ বাবে 12 নৱেম্বৰত সুৰংগটোত ভূমিস্খলনৰ ঘটনা হৈছিল ৷ ফলত 41 জনকৈ শ্ৰমিক আবদ্ধ হৈছিল ৷
নিৰ্মাণকাৰী সংস্থা, এন এইচ আই ডি চি এলৰ গাফিলতিৰ বাবে উত্তৰকাশীৰ নিৰ্মাণাধীন ছিল্কয়াৰাত উক্ত ঘটনা সংঘটিত হোৱাৰ অভিযোগ তুলি প্ৰাথমিক তদন্ত দাখিল কৰিছে তদন্তকাৰী সংস্থাটোৱে ৷
লগতে পঢ়ক : ছিল্কয়াৰাৰ সুৰংগৰ দুৰ্ঘটনা: উদ্ধাৰ অভিযানত ভাৰতে কঢ়িয়াই আনিলে আন এক কৃতিত্ব
