নেশ্যনেল ডেস্ক,11 এপ্ৰিল : পশ্চিমবংগত শনিবাৰে চতুৰ্থ পৰ্যায়ৰ ভোটগ্ৰহণৰ সময়ত চাৰিগৰাকীৰ প্ৰাণ লোৱা হিংসাত্মক ঘটনাৰ পাচত নিৰ্বাচন আয়োগে পৰৱৰ্তী 72 ঘণ্টাৰ বাবে কোচবিহাৰত ৰাজনৈতিক নেতাৰ প্ৰৱেশ নিষিদ্ধ কৰে ৷ এই ঘটনাৰ অন্তত পশ্চিমবংগৰ মুখ্যমন্ত্ৰী মমতা বেনাৰ্জীয়ে নিৰ্বাচন আয়োগত উপহাস কৰি কয় যে, নিৰ্বাচন আয়োগে নিৰ্বাচনী আচৰণ বিধিক ‘মোদী আচৰণ বিধি’ হিচাপে পুনৰ নামকৰণ কৰা উচিত ।
লগতে তেওঁ কয় যে, ‘‘বিজেপিয়ে সকলো শক্তি ব্যৱহাৰ কৰিব পাৰে, কিন্তু মোক মোৰ মানুহৰ সৈতে সুখ-দুখ ভাগ-বতৰা কৰাত বাধা দিব নোৱাৰে । তেওঁলোকে মোক কোচবিহাৰত মোৰ ভাই-ভনীসকলক তিনিদিনৰ বাবে লগ ধৰাত বাধা দিলেও মই চতুৰ্থ দিনত তাত উপস্থিত হম’’ ৷
দেওবাৰে গুলীচালনাৰ ঘটনাৰ বিৰুদ্ধে কোচবিহাৰত এক প্ৰতিবাদী সমদল অনুষ্ঠিত কৰিব আৰু মৃতকৰ ঘৰত উপস্থিত হ’ব বুলি জানিবলৈ দিয়ে মুখ্যমন্ত্ৰী গৰাকীয়ে ৷ উল্লেখ্য যে, নিৰ্বাচন আয়োগৰ নিৰ্দেশানুসৰি কোনো দলৰ কোনো ৰাজনৈতিক নেতাক পৰৱৰ্তী 72 ঘণ্টাৰ বাবে কোচবিহাৰৰ ভৌগোলিক সীমাত প্ৰৱেশ কৰিবলৈ অনুমতি দিয়া উচিত নহয় ৷ কিয়নো শনিবাৰে চতুৰ্থ পৰ্যায়ৰ ভোটগ্ৰহণৰ সময়ত হোৱা নিৰ্বাচনী হিংসাত চাৰিগৰাকী লোক নিহত হয় ।
নিৰ্বাচন আয়োগে জনোৱা মতে, মৃত চাৰিগৰাকী ব্যক্তিৰ অন্তিম সংস্কাৰ এতিয়ালৈকে সম্পূৰ্ণ হোৱা নাই ৷ ৰাজনৈতিক নেতাসকলে নিহত কেইগৰাকীৰ পৰিয়ালৰ সৈতে শোক প্ৰকাশ কৰাৰ উদ্দেশ্যে কোচবিহাৰত উপস্থিত হ’ব পাৰে ৷ ইয়াৰ ফলস্বৰূপে এই ঠাই আৰু কাষৰীয়া স্থানসমূহতো আইন-শৃংখলা সমস্যাৰ সৃষ্টি কৰিব পাৰে ৷
লগতে পঢ়ক : জন্মু-কাশ্মীৰত সেনা-সন্ত্ৰাসবাদীৰ সংঘৰ্ষত নিহত তিনি সন্ত্ৰাসবাদী
