নেশ্যনেল ডেস্ক,১২ জুন : হজৰত মহম্মদ সন্দৰ্ভত বিতৰ্কিত মন্তব্য (Prophet Mohammad controversy) কৰাৰ পাছতে বিজেপিৰ পৰা নিলম্বিত নূপুৰ শৰ্মাৰ বিৰুদ্ধে তীব্ৰ প্ৰতিবাদ দেখিবলৈ পোৱা গৈছে । দেশৰ ভিন্ন প্ৰান্তত উক্ত মন্তব্যক লৈ উত্তপ্ত পৰিৱেশৰ সৃষ্টি হৈছে । বহু স্থানত আকৌ প্ৰতিবাদৰ সময়ত হিংসাত্মক ঘটনাও সংঘটিত হৈছে । শুকুৰবাৰে উত্তৰ প্ৰদেশৰ বিভিন্ন স্থানতো হিংসাত্মক প্ৰতিবাদ হোৱা দেখা গৈছিল ।
হিংসাত্মক ঘটনা সন্দৰ্ভত ইতিমধ্যে উত্তৰ প্ৰদেশ আৰক্ষীয়ে ৰাজ্যখনৰ প্ৰায় ৮ খন জিলাৰ পৰা ৩০০ ৰো অধিক লোকক গ্ৰেপ্তাৰ কৰিছে । দেওবাৰে প্ৰকাশ কৰা এক বিবৃতিত অতিৰিক্ত আৰক্ষী সঞ্চালক প্ৰধান (আইন-শৃংখলা) প্ৰশান্ত কুমাৰে কয় যে, ৰাজ্যখনৰ আঠখন জিলাৰ পৰা প্ৰায় ৩০৪ জন লোকক গ্ৰেপ্তাৰ কৰা হৈছে (UP Police arrests 304 people for violence) ৷ আন ৯ খন জিলাত এই সন্দৰ্ভত ১৩ টা গোচৰ ৰুজু কৰা হৈছে ।
তেওঁ উল্লেখ কৰা মতে, প্ৰয়াগৰাজত ৯১ গৰাকী, চাহাৰনপুৰত ৭১ গৰাকী, হাথৰসত ৫১ গৰাকী, আম্বেদকাৰ নগৰ আৰু মোৰাদাবাদত ৩৪ গৰাকী, ফিৰোজাবাদত ১৫ গৰাকী, আলিগড়ত ৬ গৰাকী আৰু জালাউনত ২ জন লোকক আৰক্ষীয়ে গ্ৰেপ্তাৰ কৰিছে ।
জ্যেষ্ঠ বিষয়াগৰাকী কোৱা মতে, ৰুজু হোৱা ১৩ টা গোচৰৰ ভিতৰত প্ৰয়াগৰাজ আৰু চাহাৰনপুৰত তিনিটাকৈ গোচৰ ৰুজু হৈছে । ফিৰোজাবাদ, আম্বেদকাৰ নগৰ, মোৰাদাবাদ, হাথৰস, আলিগড়, লখিমপুৰ খেৰী আৰু জালাউনত এটাকৈ গোচৰ ৰুজু কৰা হৈছে । ইফালে ৰাজ্যখনত সংঘটিত হিংসাত্মক ঘটনা সন্দৰ্ভত মুখ্যমন্ত্ৰী যোগী আদিত্য নাথে শনিবাৰে এক কঠোৰ সতৰ্কবাণী জাৰি কৰিছে ।
মুখ্যমন্ত্ৰীগৰাকীয়ে সকীয়নি প্ৰদান কৰি কয় যে, বিভিন্ন চহৰৰ পৰিৱেশ নষ্ট কৰাৰ প্ৰচেষ্টাত জড়িত অসামাজিক উপাদানসমূহৰ বিৰুদ্ধে কঠোৰতম ব্যৱস্থা গ্ৰহণ কৰা হ'ব । তেওঁৰ মতে সভ্য সমাজত এনে অসামাজিক লোকৰ কোনো স্থান নাই । এগৰাকী দোষীকো এৰি দিব নালাগে বুলি বিষয়াসকলক নিৰ্দেশ দিয়ে মুখ্যমন্ত্ৰীয়ে ।
উল্লেখ্য যে, নূপুৰ শৰ্মাৰ বিৰুদ্ধে ৰাজ্যখনত হোৱা প্ৰতিবাদে হিংসাত্মক ৰূপ লোৱা দেখা গৈছিল । একাংশ প্ৰতিবাদকাৰীয়ে আৰক্ষীৰ বাহনত অগ্নি সংযোগ কৰাৰ লগতে বিভিন্ন ধৰণৰ হিংসাত্মক কাৰ্যকলাপত লিপ্ত হয় । যাৰ বাবে আৰক্ষী তথা প্ৰশাসনে প্ৰতিবাদকাৰীৰ বিৰুদ্ধে কঠোৰ পদক্ষেপ হাতত লৈছে ।
লগতে পঢ়ক :Protest against Nupur Sharma : নুপুৰ শৰ্মাক গ্ৰেপ্তাৰৰ দাবীত দিল্লীৰ জামা মছজিদত প্ৰতিবাদ
