নিউজ ডেস্ক, 30 নৱেম্বৰ: টুকুৰা - টুকুৰকৈ কাটি বিক্ৰি কৰাৰ উদ্দেশ্যে লৈ অহা এটা কাছ জীৱন্তে উদ্ধাৰ কৰি মহানতাৰ পৰিচয় দিছে এগৰাকী প্ৰবক্তাই ৷ শিলচৰৰ অসম বিশ্ববিদ্যালয়ৰ এগৰাকী প্ৰবক্তা ডঃ সাৰ্বনী গিৰিয়ে মাছৰ বজাৰত এগৰাকী ব্যৱসায়ীৰ পৰা বিক্ৰিৰ বাবে লৈ অনা কাছটো উদ্ধাৰ কৰে ৷ প্ৰবক্তা গৰাকীয়ে দক্ষিণ এচিয়াত উপলব্ধ ইণ্ডিয়ান পিক'ক চফ্টচেল টাৰ্টল (নিলচনিয়া হুৰুম) প্ৰজাতিৰ কাছটো উদ্ধাৰ কৰে ৷
কাছাৰ বন সংমণ্ডলে জনোৱা তথ্য অনুসৰি অন্য দিনৰ দৰেই মাছ ক্ৰয় কৰাৰ উদ্দেশ্যে ডঃ সাৰ্বনী গিৰি মাছৰ বজাৰলৈ গৈছিল আৰু বজাৰতেই তেওঁ এগৰাকী মানুহে বিক্ৰিৰ বাবে অনা কাছটো প্ৰত্যক্ষ কৰে ৷ কাছটো বিক্ৰিৰ বাবে লৈ অনা মানুহজনে কাছটো টুকুৰাকৈ কাটি বিক্ৰি কৰিব বুলি গম পোৱাৰ পাছতে প্ৰবক্তা গৰাকীয়ে 4000 টকাৰে কাছটো জীৱন্ত অৱস্থাত ক্ৰয় কৰি লয় ৷
ডঃ সাৰ্বনীয়ে কাছটো তেওঁৰ ঘৰলৈ লৈ আনে আৰু কোনো সুৰক্ষিত স্থানত কাছটোক এৰি দিবৰ বাবে শিলচৰৰ কাছাৰ বন সংমণ্ডলক খবৰ দিয়ে ৷ বন বিভাগে কাছটো তেওঁৰ পৰা সংগ্ৰহ কৰে আৰু বিৰল প্ৰজাতিৰ কাছটো জীৱন্তে উদ্ধাৰ কৰাৰ বাবে ডঃ সাৰ্বনী গিৰিক ধন্যবাদ জ্ঞাপন কৰে ৷
উক্ত ঘটনাৰ পাছতে বন বিভাগে মীন বিভাগৰ সৈতে মিলি মাছুৱৈ সকলৰ মাজত সজাগতা সৃষ্টিৰ বাবে এক সিদ্ধান্ত গ্ৰহণ কৰে ৷ অদূৰ ভৱিষ্যতে যাতে এনে অনুৰূপ ঘটনাৰ পৰা বিৰল প্ৰজাতিৰ কাছসমূহ ৰক্ষা কৰিব পৰা যায় সেই উদ্দেশ্য আগত ৰাখিয়ে বন বিভাগে উক্ত সিদ্ধান্ত গ্ৰহণ কৰে ৷
উল্লেখ্য যে ইণ্ডিয়ান পিক'ক চফ্টচেল টাৰ্টল (নিলচনিয়া হুৰুম) দক্ষিণ এচিয়াত উপলব্ধ কাছৰ এবিধ প্ৰজাতি আৰু এইবিধ কাছ আইইউচিএন ৰ ৰঙা তালিকাত সংকটাপন্ন প্ৰজাতি হিচাপে তালিকাভুক্ত কৰা হৈছে ৷
