নেশ্যনেল ডেস্ক, 17 ডিচেম্বৰ : প্ৰধানমন্ত্ৰী নৰেন্দ্ৰ মোডী আৰু বাংলাদেশৰ প্ৰধানমন্ত্ৰী শ্বেইখ হাছিনাই আজি এক ভাৰ্চুৱেল বৈঠকত অংশগ্ৰহণ কৰিব ৷ এই বৈঠকত দুয়োগৰাকী নেতাই দ্বিপাক্ষিক সম্পৰ্ক গাঢ় কৰা সন্দৰ্ভত আলোচনা কৰিব ৷
বিজয় দিৱসৰ এটা দিন পাচতে এই বৈঠকৰ আয়োজন কৰা হৈছে ৷ উল্লেখ্য যে, 1971 চনত পাকিস্তানৰ বিৰুদ্ধে ভাৰতে জয় সাব্যস্ত কৰাৰ পাচতে বাংলাদেশ এক নতুন ৰাষ্ট্ৰ হিচাপে গঠন হৈছিল ৷ পাকিস্তানৰ বিৰুদ্ধে যুদ্ধ জয়ৰ এই দিনটোকে ভাৰতত বিজয় দিৱস হিচাপে পালন কৰা হয় ৷
ভাৰত আৰু বাংলাদেশে দ্বিপাক্ষিক সম্পৰ্ক দৃঢ় কৰাৰ লগতে বিভিন্ন ক্ষেত্ৰত সহযোগিতা আগবঢ়োৱাৰ বাবে কাম কৰি আহিছে ৷ 2019 চনৰ অক্টোবৰ মাহত বাংলাদেশৰ প্ৰধানমন্ত্ৰীগৰাকীয়ে ভাৰত ভ্ৰমণ কৰিছিল ৷
আনহাতে, 2020 চনৰ মাৰ্চত 'মুজিব বৰষো' উপলক্ষ্যে প্ৰধানমন্ত্ৰী মোডীয়ে এক ভিডিঅ' বাৰ্তাও প্ৰেৰণ কৰিছিল ৷ আনহাতে, ক'ভিড-19 মহামাৰীৰ সময়ছোৱাতো দুয়োগৰাকী নেতাই যোগাযোগ অব্যাহত ৰাখিছিল ৷
দুয়োখন দেশে পৰিবহণ আৰু যোগাযোগৰ ক্ষেত্ৰতো সহযোগিতা বৃদ্ধি কৰাৰ বাবে প্ৰয়াস অব্যাহত ৰাখিছে ৷
লগতে পঢ়ক : টেলীকমৰ নতুন পৰিসেৱা প্ৰদান কৰা প্ৰতিষ্ঠান সমূহলৈ ভাল খবৰ
