নিউজ ডেস্ক, 7 ডিচেম্বৰ: এক জৰুৰী কেবিনেট বৈঠকত নাগালেণ্ড চৰকাৰে AFSPA বাতিল কৰিবলৈ কেন্দ্ৰীয় চৰকাৰক আহ্বান জনোৱাৰ সিদ্ধান্ত গ্ৰহণ কৰে ৷ নাগালেণ্ড চৰকাৰে ক’হিমাত চলি থকা হৰ্ণবিল উৎসৱো বাতিল কৰাৰ সিদ্ধান্ত গ্ৰহণ কৰে ৷
অসমৰ মুখ্যমন্ত্ৰী তথা নেদা (NEDA)ৰ আহ্বায়ক ড৹ হিমন্ত বিশ্ব শৰ্মাই ইতিমধ্যেই দিল্লীলৈ উৰা মাৰিছে আৰু বিয়লি ৪ বজাত কেন্দ্ৰীয় গৃহমন্ত্ৰী অমিত শ্বাহৰ লগত এক গুৰুত্বপূৰ্ণ বৈঠকত মিলিত হ’ব ৷ এই বৈঠকত উত্তৰ-পূৰ্বাঞ্চলৰ ৰাজ্য সমূহৰ আইন-শৃংখলা জনিত পৰিস্থিতি আৰু বিশেষকৈ ম'ন জিলাৰ ঘটনাৰ পাছত সমগ্ৰ উত্তৰ-পূৰ্বাঞ্চলত সৃষ্টি হোৱা AFSPA বাতিলৰ শেহতীয়া যি দাবী, তাৰ ওপৰত আলোচনা হোৱাৰ সম্ভাৱনা আছে ৷
এই সিদ্ধান্ত সমূহ বিগত শনিবাৰে ৰাজ্যখনৰ ম’ন জিলাত সংঘটিত হোৱা নৰসংহাৰৰ প্ৰতিবাদত গ্ৰহণ কৰা হয় ৷
শনিবাৰে নিশা নাগালেণ্ডৰ ম'ন জিলাৰ তিৰু গাঁৱত নিৰাপত্তাৰক্ষীয়ে উগ্ৰপন্থী সংগঠন এনএছচিএনৰ সদস্য বুলি কেইজনমান নগা যুৱকক অতৰ্কিতে আক্ৰমণ কৰাৰ পাছতেই নাগালেণ্ডৰ পৰিস্থিতি উত্তপ্ত হৈ পৰিছিল । নিৰাপত্তাৰক্ষীৰ দ্বাৰা সংঘটিত হোৱা এই গুলীচালনাত ১৪ জনকৈ নগা যুৱকে প্ৰাণ হেৰুৱাইছিল ৷ এই ঘটনাত ১ জন নিৰাপত্তাৰক্ষী মৃত্যু হোৱাৰ লগতে 13 জন নিৰাপত্তাবাহিনীৰ লোক আহত হয় ।
লগতে পঢ়ক : AASU Demand to Repeal AFSPA : AFSPA প্ৰত্যাহাৰৰ দাবী আছুৰ
