নিউজ ডেস্ক, 4 অক্টোবৰ : দেওবাৰে নিশা আৰু সোমবাৰে পুৱতি নিশা মুম্বাইৰ বান্দ্ৰা, আন্ধেৰী আৰু লোখণ্ডৱালাত ধাৰাবাহিক অভিযান চলাই এটা ড্ৰাগছ সৰবৰাহকাৰী(Drug Supplier)ক জিম্মাত লয় নাৰ্কোটিক্স কণ্ট্ৰ’ল ব্যুৰো চমুকৈ এন চি বিয়ে ৷ ইয়াৰ পূৰ্বে শনিবাৰে এন চি বিয়ে মুম্বাইৰ এটি ক্ৰুজ পাৰ্টি(Cruise Party)ত চলোৱা অভিযানত ড্ৰাগছ ব্যৱহাৰ কৰাৰ অভিযোগত 8 জনক সোধ-পোচৰ বাবে আটক কৰে ৷
আটকাধীনসকলক ভিতৰত আছে বলীউডৰ বাদশ্বাহ খ্যাত অভিনেতা শ্বাহৰুখ খান(Shah Rukh Khan)ৰ পুত্ৰ আৰিয়ান খান(Aryan Khan) ৷ আৰিয়ান খান, আৰবাজ ছেথ মাৰ্চেণ্ট(Arbaz Seth Merchant) আৰু মুনমুন ধামেচা(Munmun Dhamecha)ক মুম্বাইৰ এস্প্লেনেড আদালতে(Esplanade Court) এন চি বিৰ জিম্মালৈ প্ৰেৰণ কৰা বুলি জানিব পৰা গৈছে ।
গোচৰৰ পৰৱৰ্তী শুনানি সোমবাৰে আবেলি ভাগত গ্ৰহণ কৰিব আদালতে ৷ আন আটকাধীনসকল হৈছে- নূপূৰ সতীজা, ঈশমিত সিং চাধা, মোহক জয়ছোৱাল, গোমিত চোপ্ৰা আৰু বিক্ৰান্ত ছোকাৰ ৷ ইতিমধ্যে তেওঁলোকৰ স্বাস্থ্য পৰীক্ষা কৰোৱা হৈছে আৰু সোমবাৰে তেওঁলোকক হাজিৰ কৰোৱা হ’ব আদালতত ৷
শনিবাৰে সন্ধিয়া ভাগত এন চি বিৰ এটা দলে কৰ্ডেলিয়া ক্ৰুজ জাহাজ(Cordelia Cruise ship )ত ড্ৰাগছৰ এটা পাৰ্টি উদঘাটন কৰে ৷ এই দলটোৱে মধ্য সাগৰেদি গোৱালৈ যাত্ৰা কৰিছিল । এনচিবি মুম্বাইৰ সঞ্চালক সমীৰ ৱাংখেড়েই জনোৱা মতে, ক্ৰুজ জাহাজত ড্ৰাগছ জব্দ কৰাৰ সন্দৰ্ভত আঠজন লোকক সোধপোচৰ বাবে আটক কৰিছে এন চি বিয়ে ৷
লগতে পঢ়ক : NCBৰ জালত শ্বাহৰুখ খানৰ পুত্ৰ আৰিয়ান খান !
