নেশ্যনেল ডেস্ক,২ ডিচেম্বৰ : পঞ্জাৱৰ সাংৰুৰত ভয়ংকৰ ঘটনা । সাংৰুৰৰ মেৰিটৰিয়াছ স্কুল ঘাব্দাত মধ্যাহ্ন ভোজন গ্ৰহণ কৰি কেইবাগৰাকী শিক্ষাৰ্থী অসুস্থ হৈ পৰিছে । প্ৰায় ৪০ গৰাকী শিক্ষাৰ্থীৰ স্বাস্থ্যৰ অৱনতি হোৱাৰ পাছতে তেওঁলোকক চৰকাৰী চিকিৎসালয়ত ভৰ্তি কৰোৱা হয় । শিক্ষাৰ্থীসকলক মধ্যাহ্ন ভোজনৰ নামত বিষাক্ত খাদ্য প্ৰদান কৰাৰ অভিযোগ অভিভাৱকসকলৰ । অভিভাৱকসকলে এই সন্দৰ্ভত তীব্ৰ প্ৰতিবাদো সাব্যস্ত কৰিছে । অভিভাৱকসকলে অভিযোগ কৰা মতে দীপাৱালীৰ পাছৰে পৰা বিদ্যালয়ৰ হোষ্টেলত শিক্ষাৰ্থীসকলক ভালদৰে খাদ্য যোগান ধৰা হোৱা নাছিল ।
উল্লেখ্য যে চৰকাৰে শিক্ষাৰ্থীসকলক মধ্যাহ্ন ভোজন যোগান ধৰাৰ কথা কয় । কিন্তু শিক্ষাৰ্থীসকলক কেনে ধৰণৰ খাদ্য যোগান ধৰা হয় তাৰ প্ৰতি চৰকাৰে কোনো মনোযোগ নিদিয়ে । যাৰ বাবে সাংৰুৰৰ মেৰিটৰিয়াছ স্কুলত এনে ধৰণৰ ঘটনা সংঘটিত হ'ল । জানিব পৰা মতে বিদ্যালয়খনৰ শিক্ষাৰ্থীসকলে হোষ্টেলত মধ্যাহ্ন ভোজন গ্ৰহণ কৰিছিল । তাৰ পাছত নিশালৈ প্ৰায় ৪০ গৰাকী শিক্ষাৰ্থী গুৰুতৰভাৱে অসুস্থ হৈ পৰে । চৰকাৰী চিকিৎসালয়ত ভৰ্তি হোৱা শিক্ষাৰ্থীসকলেও অভিযোগ কৰিছে যে বিদ্যালয় কৰ্তৃপক্ষই তেওঁলোকক দিয়া খাদ্য অস্বাস্থ্যকৰ আছিল ।
