নেশ্যনেল ডেস্ক,22 ডিচেম্বৰ: ভাৰতীয় সেনাত যোগদান শ্বহীদ নৌ সেনা বিষয়াৰ পত্নীৰ ৷ নিজৰ স্বামীৰ দৰে ভাৰত মাতৃৰ সেৱাৰ বাবে ভাৰতীয় সেনাত যোগদান কৰিলে নৌ সেনা বিষয়া স্বৰ্গীয় ধৰ্মেন্দ্ৰ সিং চৌহানৰ পত্নী কৰুণা চৌহানে ৷ আগ্ৰাৰ দয়ালবাগ বিশ্ববিদ্যালয়ৰ অধ্যাপক কৰুণাই 2019 বৰ্ষৰ 10 মাৰ্চত স্বৰ্গীয় ধৰ্মেন্দ্ৰ সিঙৰ সৈতে বিবাহপাশত আবদ্ধ হৈছিল ৷
বিয়াৰ পিছতেই তাৎক্ষণিকভাৱে কৰ্তব্যত যোগদান কৰিছিল ধৰ্মেন্দ্ৰ সিং চৌহানে ৷ আই এন এচ বিক্ৰমাদিত্যত দায়িত্বত থকা ধৰ্মেন্দ্ৰই, কৰ্ণাটক বন্দৰত উপস্থিত হোৱাৰ পূৰ্বে আই এন এচ বিক্ৰমাদিত্যত সংঘটিত অগ্নিকাণ্ডত প্ৰাণ হেৰুৱায় ৷ অনাকাংশিতভাৱে বিবাহৰ 40 দিন পিছতেই বিধবাৰ বসন পৰিধান কৰিবলগীয়া হয় কৰুণাই ৷
যদিও কৰুণাই কয় যে, স্বামীৰ মৃত্যুৰ বাতৰিয়ে তেঁওক সম্পূৰ্ণৰূপে বিধস্ত কৰি পেলাইছিল ততাপিও তেওঁ গৌৰৱান্বিত যে তেওঁৰ স্বামীয়ে দেশৰ বাবে নিজৰ জীৱন ত্যাগ কৰিছে ৷ এই অনাকাংশিত বাতৰি লাভ কৰা সময়ত স্বামীগৃহত আছিল কৰুণা ৷
প্ৰতিগৰাকী নাৰীৰ দৰে কৰুণাৰো নিজৰ বিয়া আৰু কেৰিয়াৰক লৈ যথেষ্ট সপোন আছিল ৷ ধৰ্মেন্দ্ৰক তেঁও উপযুক্ত জীৱন সংগী হিচাপে লাভ কৰিছিল ৷ কিন্তু হঠাতে সকলো সলনি হৈ যায় ৷ প্ৰথমাৱস্থাত তেঁও সম্পূৰ্ণৰূপে অসহায় অনুভৱ কৰিছিল যদিও ধৰ্মেন্দ্ৰৰ মাতৃ টিনা কুৱৰ চৌহান আৰু পিতৃ কষ্ণ সিং চৌহানে তেখেতক যথেষ্ট সাহয় প্ৰদান কৰে ৷
ভাৰতীয় সেনাত যোগদানৰ ক্ষেত্ৰত তেঁওক অনুপ্ৰেৰণা প্ৰদান কৰা প্ৰথমগৰাকী ব্যক্তিয়ে আছিল ৰতলাম জিলা সৈনিক ৱেলফেয়াৰ সংস্থাৰ প্ৰধান গ্ৰুপ কেপ্টেইন ইৰফান খান ৷ তেঁওৰ দ্বাৰা অনুপ্ৰাণিত হৈ তেঁও আন এগৰাকী ঘৰুৱা বন্ধু কৰ্ণেল নিখিল দেৱানৰ সৈতে এই সন্দৰ্ভত আলোচনা কৰে ৷ আৰু নিখিল দেৱানৰ তত্বাৱধানতে এছ এছ বিৰ ইন্টাৰভিউৰ বাবে প্ৰস্তুতি আৰম্ভ কৰে কৰুণাই ৷
কৰুণাই জনায় যে, শ্বহীদ সেনাসকলৰ পত্নীৰ বাবে থকা ‘বীৰ নাৰী’ শাখাৰ বাবে কোনোধৰণৰ লিখিত পৰীক্ষাত অৱতীৰ্ণ হ’ব নালাগে ৷ প্ৰ-পত্ৰ পুৰণৰ পিছতে তেঁওক সাক্ষাৎকাৰৰ বাবে মাতি পঠিওৱা হয় ৷
2019 বৰ্ষতো ভাৰতীয় সেনাৰ বাবে আবেদন কৰিছিল কৰুণাই; কিন্তু সফল হ’ব পৰা নাছিল ৷ কিন্তু ইয়াতেই আশা নেহেৰুৱাই কৰুণাই পুনৰ ভাৰতীয় সেনাত আবেদন কৰে আৰু এইবেলি সাক্ষাৎকাৰৰ বাবে নিৰ্বাচিত হয় ৷ 2021 বৰ্ষৰ 7 জানুৱাৰীত 11 মাহৰ মিলিটাৰী অনুশীলনৰ বাবে চেন্নাইৰ OTAত যোগদান কৰিব কৰুণাই ৷ নিজৰ বোৱাৰী ভাৰতীয় সেনাত যোগদানক লৈ উৎসাহিত হৈ পৰিছে কৰুণাৰ শহুৰ-শাহুৱেক ৷
লগতে পঢ়ক-আগ্ৰাৰ যমুনা এক্সপ্ৰেছৱেত জীৱন্তে অগ্নিদগ্ধ হয় পাঁচজনকৈ লোক
