হিমাচলত ভূমিস্খলনত দুজন লোক আহত হোৱাৰ লগতে এজনৰ মৃত্যু

হিমাচল প্ৰদেশৰ চোলান জিলাৰ পাৰৱানুৰ চেক্টৰ তিনিৰ এখন হোটেলৰ ওচৰত সংঘটিত এই ভূমিস্খলনত এজন ২২ বছৰীয়া যুৱকৰ মৃত্যু হোৱাৰ লগতে আন দুজন গুৰুতৰভাবে আহত হয় ।

নেশ্যনেল ডেস্ক, 4 আগষ্ট : হিমাচল প্ৰদেশৰ চোলান জিলাত মঙলবাৰে ভূমিস্খলনৰ এক ঘটনা সংঘটিত হয় ৷ এই ভূমিস্খলনৰ ফলত অঞ্চলটোৰ এজন যুৱকৰ মৃত্যু হয় ৷ মৃত যুৱকজন উত্তৰ প্ৰদেশৰ কানপুৰৰ জাখিয়ান গাঁৱৰ লালু ৰাম(22) বুলি জানিব পৰা হৈছে ৷ আনহাতে এই ভূমিস্খলনত আন দুজন লোক গুৰুতৰভাবে আহত হয় ৷ আহত লোক দুজন কানপুৰৰ অমৰ সিং(19) আৰু পাৰৱানুৰ ৰাম লাল থাপা (47) ।

হিমাচল প্ৰদেশৰ চোলান জিলাৰ জৰুৰীকালীন অভিযান কেন্দ্ৰ(Emergency Operation Centre) ৰ পৰা পোৱা তথ্য অনুসৰি পুৱতি নিশা পাৰৱানুৰ চেক্টৰ তিনিৰ এখন হোটেলৰ ওচৰত এই ভূমিস্খলন সংঘটিত হয় ৷ চিৰমৌৰ জিলাত সংঘটিত এই ভূমিস্খলনৰ ফলত নাহান-কুমহাৰহাট্টি ৰাষ্ট্ৰীয় ঘাইপথটো বন্ধ হৈ পৰে ৷

ৰাজ্যিক দুৰ্যোগ প্ৰশমন বিভাগে সদৰি কৰা অনুসৰি, লাড্ডুৰ ওচৰত এই ভূমিস্খলনৰ ঘটনা সংঘটিত হৈছিল ৷ ভূমিস্খলনৰ ফলত নাহান-কুমহাৰহাট্টি ৯০৭-A ৰাষ্ট্ৰীয় ঘাইপথৰ অংশ নিশা প্ৰায় ১ বজাত বন্ধ হৈ পৰে ৷ সম্প্ৰতি আৰ্থমুভাৰ আৰু এয়াৰ কম্প্ৰেচাৰৰ জৰিয়তে পথটো মুকলি কৰাৰ বাবে ব্যৱস্থা কৰা হৈছে ।

লগতে পঢ়ক : #JeeneDo: ধৰ্ষণৰ বিষয়ে উদ্ভট মন্তব্য কৰা দেশৰ একাংশ আগশাৰীৰ লোক