নেশ্যনেল ডেস্ক,১৪ এপ্ৰিল: বিশ্বৰ সৰ্ববৃহৎ বন্তি হিচাপে গিণিজ বুক অৱ ৱৰ্ল্ড ৰেকৰ্ডছত অন্তৰ্ভুক্ত হোৱা মহাকুম্ভ মেলাৰ বন্তিগছিয়ে এতিয়া সকলোৰে দৃষ্টি আকৰ্ষণ কৰিছে । হৰিদ্বাৰত অনুষ্ঠিত হৈ থকা মহাকুম্ভ মেলাৰ আস্থা পথত বুধবাৰে প্ৰজ্বলন কৰা হয় এই বন্তিগছি । কৰ'ণা যোদ্ধাসকলৰ নামত উৎসৰ্গিত এই বন্তিগছিত এবাৰত ২২৪৭ লিটাৰ তেল ঢালিব পাৰি ।
হৰিদ্বাৰৰ জিলা দণ্ডাধীশ তথা কুম্ব মেলাৰ বিষয়া দীপক ৰাৱটে বুধবাৰে বন্তিগছি প্ৰজ্বলন কৰি আনুষ্ঠানিকভাৱে উদ্বোধন কৰে । তেওঁ লগতে কয় যে, বৰ্তমান ক'ভিড-১৯ মহামাৰীয়ে সৃষ্টি কৰা সংকটৰ সময়ত বন্তিগছি সকলোৰে বাবে অনুপ্ৰেৰণা হ'ব বুলি আশা কৰা হৈছে । বিশ্বৰ সৰ্ববৃহৎ বন্তিগছি জনপ্ৰিয় স্মাৰ্টফোন আৰু স্মাৰ্ট টিভি ব্ৰেণ্ড, এম আই ইণ্ডিয়াই দান কৰিছে ।
বিগত বৰ্ষত দুৰ্গা পূজাৰ সময়ত কোম্পানীটোৱে কলকাতাত বন্তি উন্মোচন কৰিছিল আৰু আশাৰ ৰেঙণি বুলি অভিহিত কৰিছিল । এম আই ইণ্ডিয়াই কুম্ভ মেলা আয়োজক সমিতিক বন্তিগছি দান কৰিছে ।
এম আই ইণ্ডিয়াৰ এজন বিষয়াই কয় যে, কোম্পানীটোৱে পৰৱৰ্তী কেইটামান দিনৰ বাবে বন্তিগছি প্ৰজ্বলন কৰাৰ ব্যয় বহন কৰিব আৰু হৰিদ্বাৰ জিলা প্ৰশাসনে বন্তিগছিৰ দায়িত্ব গ্ৰহণ কৰিব ।
লগতে পঢ়ক: হায়দৰাবাদৰ ভিন্ন অঞ্চলত প্ৰবল বৃষ্টিপাত
