নিউজ ডেস্ক, 31 আগষ্ট : বিশ্বৰ সৰ্ববৃহৎ পৰিয়াল বুলি জনাজাত পৰিয়ালটো 167 গৰাকী সদস্য আছে ৷ পিছে আপুনি ভবাৰ দৰে পৰিয়ালটোৰ সদস্যসকলৰ লগত আত্মীয়সকলক লৈ তেওঁলোকক বিশ্ব আটাইতকৈ ডাঙৰ পৰিয়াল হিচাপে খ্যাতি দিয়া হোৱা নাই ৷ পৰিয়ালটোৰ মুৰব্বী, তেওঁৰ স্ত্ৰী আৰু সন্তানকলৈহে এই পৰিয়ালটোৱে বিশ্বৰ সৰ্ববৃহৎ পৰিয়াল হিচাপে স্বীকৃতি লাভ কৰিছে ৷
আপুনি হয়তো ভাবিছে এটা পৰিয়ালত ইমান সদস্য কেনেদৰে হ’ব পাৰে ? ক’ত আছে এই পৰিয়ালটো ? পৰিয়ালটোৰ মুৰব্বী কোন ?
এই পৰিয়ালটো আছে অসমৰ নিচেই সমীপৱৰ্তী ৰাজ্য মিজোৰামত ৷ জায়না চানা(Ziona Chana) নামৰ এই ব্যক্তিগৰাকীৰ পৰিয়াল 166 গৰাকী সদস্য আছে আৰু এই পৰিয়ালটোকেই বিশ্বৰ সৰ্ববৃহৎ পৰিয়াল বুলি বিশ্বাস কৰা হয় । জায়না চানা(Ziona Chana)ৰ 39 গৰাকী পত্নী আৰু 94 টা সন্তান আৰু 33 গৰাকী নাতি-নাতিনীৰে ভৰপূৰ এখন সংসাৰ আছে ৷
অৱশ্যে 2016 চনত 76 বছৰ বয়সত বিশ্বৰ সৰ্ববৃহৎ পৰিয়ালটোৰ মুৰব্বী জায়না চানা(Ziona Chana)ৰ মৃত্যু হয় ৷ মিজোৰামৰ মুখ্যমন্ত্ৰী জোৰামথাংগাই(Zoramthanga) টুইট কৰি জায়না চানাৰ মৃত্যু কথা সদৰী কৰি শোক প্ৰকাশ কৰিছিল ৷ জায়না চানা(Ziona Chana)ৰ মৃত্যুৰ পাঁচ বছৰৰ পাছতো এই পৰিয়ালটো বিশ্বৰ সৰ্ববৃহৎ পৰিয়াল হিচাপে পৰিগণিত হৈ আছে ৷
জায়না চানাই 1959 চনত 15 বছৰ বয়সত প্ৰথম বিবাহপাশত আৱদ্ধ হৈছিল আৰু এতিয়া তেওঁৰ মুঠ 39 গৰাকী পত্নী আছে ৷ ভাৰতীয় আইন অনুসৰি এজন ব্যক্তিয়ে এবাৰহে বিবাহপাশত আৱদ্ধ হ’ব পাৰে ৷ বিবাহ বিচ্ছেদৰ পাছতহে তেওঁ দ্বিতীয়বাৰ বিবাহপাশত আৱদ্ধ হ’ব পাৰে ৷ কিন্তু জায়না চানা(Ziona Chana) বহুবিবাহৰ অনুমতি দিয়া মিজোৰামৰ এটা স্থানীয় খ্ৰীষ্টান সম্প্ৰদায়ৰ আছিল ৷
জায়নাই তেওঁৰ পৰিয়ালৰ সৈতে মিজোৰামৰ এখন দূৰৱৰ্তী গাঁও বাকটাৱং(Baktawng)ত প্ৰায় 100 টা কোঠাৰ এটা চাৰিমহলীয়া গুলপীয়া ৰঙৰ ঘৰত বাস কৰে ৷ সম্প্ৰতি এই পৰিয়ালটো পৰ্যটকৰ বাবেও আকৰ্ষণক কেন্দ্ৰ হৈ পৰিছে ।
জায়না চানা(Ziona Chana) 2011 চনত এটা সংবাদ প্ৰতিষ্ঠানক দিয়া সাক্ষাৎকাৰত তেওঁ পৰিয়ালটো আৰু অধিক বৃদ্ধি কৰাৰ আশা থকাৰ কথা ব্যক্ত কৰে ৷ তেওঁ ইয়াৰ বাবে আনকি পুনৰ বিবাহপাশত আৱদ্ধ হ’বলৈ সাজু থকাৰ কথা জানিবলৈ দিয়ে ৷
লগতে পঢ়ক : জনা-নজনা : বিমানৰ বাহিৰত সঁচাকৈ ওলমি যাব পাৰি নে ?
