আগৰতলা, 8 মে’: সদ্য সমাপ্ত ত্ৰিপুৰা জনজাতীয় স্বায়ত্বশাসিত জিলা পৰিসদৰ নিৰ্বাচনত আই এন পি টি-টিপ্ৰা(TIPRA)ৰ মিত্ৰজোঁটে অভূতপূৰ্ব সফলতা প্ৰদৰ্শন কৰাৰ পিছতে এই দুয়োটা দল একেখন পতাকাৰ তললৈ অহাটো প্ৰায় নিশ্চিত হৈ পৰিছে ৷
এই দুয়ো দলৰে শীৰ্ষ কাৰ্যকৰ্তাই নিজাববীয়াকৈ সিদ্ধান্ত লৈছে যে, ৰাজ্যখনৰ আটাইতকৈ পুৰণি আঞ্চলিক দল আই এন পি টি অতি শীঘ্ৰে প্ৰদ্যুৎ কিশোৰ দেৱবৰ্মন নেতৃত্বাধীন টিপ্ৰা(TIPRA)ত আনুষ্ঠানিকভাৱে যোগদান কৰিব ৷ উল্লেখ্য যে, দীৰ্ঘসময় ধৰি টিপ্ৰা(TIPRA)ই জনজাতীয় স্বায়ত্বশাসিত জিলা পৰিসদৰ অন্তৰ্গত অঞ্চলসমূহৰ উন্নয়নৰ লগতে ‘গ্ৰেটাৰ টিপ্ৰালেণ্ড’ৰ বাবে দাবী উত্থাপন কৰি আহিছিল ৷
ত্ৰিপুৰাৰ উজ্বয়ন্ত মহলত এক সংবাদমেল সম্বোধন কৰি দেৱবৰ্মনে কয় যে, "নিৰ্বাচনৰ অন্তত ৰাজনৈতিক দলসমূহ একলগ হোৱা ঘটনা হয়তো এয়াই প্ৰথম ৷ সাধাৰণতে মিত্ৰজোঁটৰ দলসমূহে এক নিৰ্দিষ্ট মতাদৰ্শত থিয় হোৱাতকৈ নিৰ্বাচন কেন্দ্ৰীক আসনৰ হিচাপ-নিকাচতহে অধিক গুৰুত্ব প্ৰদান কৰে ৷ কিন্তু নিৰ্বাচনৰ পিছত আই এন পি টি-টিপ্ৰা(TIPRA) একেখন পতাকাৰ তলত অহাৰ ঘোষণাই সমগ্ৰ দেশতে এই বাৰ্তা প্ৰেৰণ কৰিব যে, সামগ্ৰিক প্ৰচেষ্টাই ডাঙৰ পৰিৱৰ্তন কঢ়িয়াই আনিব পাৰে ৷"
ইয়াৰ উপৰিও যদি কোনো দলে ইয়াৰ পিছতো তেওঁলোকৰ সৈতে একত্ৰিত হ’ব বিচাৰে তেন্তে এইক্ষেত্ৰতো তেওঁলোকৰ দুৱাৰ সদায় খোলা আছে বুলিও কয় প্ৰদ্যুৎ কিশোৰ দেৱবৰ্মনে ৷ ত্ৰিপুৰা জনজাতীয় স্বায়ত্বশাসিত জিলা পৰিসদৰ অন্তৰ্গত অঞ্চলসমূহৰ টিপ্ৰা, বঙালী, মুছলিম, মণিপুৰী আদি সকলো লোকৰে সামগ্ৰিক উন্নয়নেই তেওঁলোকৰ প্ৰাৰম্ভিক লক্ষ্য বুলিও মন্তব্য কৰে দেৱবৰ্মনে ৷
লগতে পঢ়ক-ক’ভিডৰ ভয়ংকৰ সংক্ৰমণক ৰোধ কৰাৰ ৰণকৌশল
