নিউজ ডেস্ক, 12 অক্টোবৰ: হামাছে ইজৰাইলক আক্ৰমণ কৰাৰ প্ৰায় এসপ্তাহৰ পাছত ভাৰতৰ বৈদেশিক পৰিক্ৰমা মন্ত্ৰালয়ে বৃহস্পতিবাৰে কয়, “ভাৰতে এই সংঘাতক সন্ত্ৰাসবাদী আক্ৰমণ হিচাপে গণ্য কৰিছে ।” এই আক্ৰমণক হয়তো ইজৰাইল আৰু গাজা দুয়োখনতে হাজাৰ হাজাৰ লোকৰ মৃত্যু হোৱা আটাইতকৈ মাৰাত্মক আক্ৰমণ বুলি ক’ব পাৰি ৷
বিদেশ মন্ত্ৰণালয়ৰ মুখপাত্ৰ অৰিন্দম বাগচীয়ে কয়, ‘‘আমি অতি স্পষ্টভাৱে কৈছোঁ যে আমি ইয়াক সন্ত্ৰাসবাদী আক্ৰমণৰ দৃষ্টিকোণেৰে চাইছোঁ । পেলেষ্টাইনৰ ক্ষেত্ৰত ভাৰতে ইজৰাইলৰ সৈতে নিৰাপদ আৰু স্বীকৃতিপ্ৰাপ্ত সীমান্তৰ ভিতৰত বাস কৰা সাৰ্বভৌম, স্বাধীন আৰু কাৰ্যক্ষম ৰাষ্ট্ৰ পেলেষ্টাইন প্ৰতিষ্ঠা কৰাৰ দিশত প্ৰত্যক্ষ আলোচনা পুনৰ আৰম্ভ কৰাৰ পোষকতা কৰিছে ।”
তেওঁ লগতে উল্লেখ কৰে যে আন্তঃৰাষ্ট্ৰীয় মানৱীয় আইন মানি চলাৰ এক সাৰ্বজনীন বাধ্যবাধকতা আছে । বিদেশ মন্ত্ৰণালয়ৰ মুখপাত্ৰ অৰিন্দম বাগচীয়ে কয় যে সন্ত্ৰাসবাদৰ সকলো ৰূপ আৰু প্ৰকাশৰ ভাবুকিৰ বিৰুদ্ধে যুঁজিবলৈও বিশ্বব্যাপী দায়িত্ব আছে । চলিত সপ্তাহৰ আৰম্ভণিতে মঙলবাৰে প্ৰধানমন্ত্ৰী নৰেন্দ্ৰ মোদীয়ে ইজৰাইলৰ প্ৰধানমন্ত্ৰী বেঞ্জামিন নেতান্য়াহুৰ সৈতে ফোনযোগে বাৰ্তালাপ কৰে ।
ইজৰাইলত সংঘটিত সন্ত্ৰাসবাদী আক্ৰমণৰ ফলত নিহত আৰু আহত হোৱা লোকসকলৰ প্ৰতি গভীৰ শোক আৰু সহানুভূতি প্ৰকাশ কৰি প্ৰধানমন্ত্ৰীয়ে এই কঠিন সময়ত ইজৰাইলৰ সৈতে সংহতিৰে ভাৰতৰ জনসাধাৰণ থিয় দিছে বুলি প্ৰকাশ কৰে । তেওঁ পুনৰ কয় যে ভাৰতে সন্ত্ৰাসবাদৰ সকলো ৰূপ আৰু প্ৰকাশৰ তীব্ৰভাৱে আৰু বিনাদ্বিধাই নিন্দা কৰে ।
প্ৰধানমন্ত্ৰীয়ে ইজৰাইলত থকা ভাৰতীয় নাগৰিকৰ সুৰক্ষা আৰু নিৰাপত্তাৰ বিষয়টোৰ ওপৰত আলোকপাত কৰে । প্ৰধানমন্ত্ৰী নেতান্যাহুৱে সম্পূৰ্ণ সহযোগিতা আৰু সমৰ্থনৰ আশ্বাস দিয়ে । দুয়োগৰাকী নেতাই ঘনিষ্ঠ যোগাযোগ ৰক্ষা কৰিবলৈ সন্মত হয় । ইফালে ‘অপাৰেচন অজয়’ৰ অধীনত আজি নিশা ইজৰাইলত উপস্থিত হ’ব প্ৰথমখন বিমান । যুদ্ধবিধ্বস্ত দেশখন এৰি বিমানখনত কমেও 230 জন যাত্ৰী কাইলৈ পুৱাৰ ভিতৰত নতুন দিল্লীত উপস্থিত হ’ব ।
লগতে পঢ়ক: MEA on Operation Ajay : অপাৰেচন অজয়: ইজৰাইলৰ পৰা ২৩০ ভাৰতীয়ক আনিবলৈ প্ৰথমখন বিমানৰ যাত্ৰা
