নিউজ ডেস্ক, 22 অক্টোবৰ : দেওবাৰে বৈদেশিক পৰিক্ৰমা মন্ত্ৰী এছ জয়শংকৰে কয় যে কানাডাই নতুন দিল্লীৰ কাম-কাজত হস্তক্ষেপ কৰাৰ উদ্বেগৰ প্ৰতি লক্ষ্য ৰাখি কানাডাৰ কূটনৈতিক উপস্থিতিত সমতা প্ৰদানৰ ব্যৱস্থা গ্ৰহণ কৰে ৷ কানাডাত ভাৰতীয় কূটনীতিবিদসকলৰ সুৰক্ষাৰ ক্ষেত্ৰত অগ্ৰগতি দেখিলে ভাৰতে কানাডিয়ানসকলক ভিছা প্ৰদান পুনৰ আৰম্ভ কৰাৰ সম্ভাৱনা আছে বুলিও বৈদেশিক পৰিক্ৰমা মন্ত্ৰীগৰাকীয়ে কয় ৷
যোৱা মাহত কানাডাৰ প্ৰধানমন্ত্ৰী জাষ্টিন ট্ৰুডোৱে জুন মাহত খালিস্তানী বিচ্ছিন্নতাবাদী হৰদীপ সিং নিজ্জাৰৰ হত্যাকাণ্ডত ভাৰতীয় এজেণ্ট জড়িত থকাৰ অভিযোগ উত্থাপন কৰাৰ পিছতে ভাৰত আৰু কানাডাৰ মাজৰ সম্পৰ্ক তীব্ৰ উত্তেজিত হৈ পৰে ৷ ট্ৰুডোৰ অভিযোগৰ কিছুদিন পিছতে ভাৰতে কানাডাৰ নাগৰিকক ভিছা প্ৰদান সাময়িকভাৱে বন্ধ কৰাৰ কথা ঘোষণা কৰি অট’ৱাক দেশত কূটনৈতিক উপস্থিতি কমাই দিবলৈ কয় ৷
ভাৰত-কানাডাৰ সম্পৰ্কৰ সন্দৰ্ভত এক প্ৰশ্নৰ উত্তৰ দি এক অনুষ্ঠানত জয়শংকৰে কয় যে যদি আমি কানাডাত আমাৰ কূটনীতিবিদসকলৰ সুৰক্ষাৰ ক্ষেত্ৰত অগ্ৰগতি দেখিবলৈ পাওঁ তেন্তে তাত ভিছা প্ৰদানৰ কাম পুনৰ আৰম্ভ কৰিব বিচাৰিম ৷ ভাৰতত কানাডাৰ কূটনৈতিক উপস্থিতি হ্ৰাস কৰাৰ সন্দৰ্ভত তেওঁ কয় যে কূটনৈতিক সম্পৰ্কৰ ভিয়েনা সন্ধিত কূটনৈতিক সমতাৰ যথেষ্ট পৰিমাণে ব্যৱস্থা কৰা হৈছে ৷
জয়শংকৰে কয় যে, "ভিয়েনা সন্ধিৰ দ্বাৰা সমতা যথেষ্ট পৰিমাণে প্ৰদান কৰা হৈছে, যিটো এই সন্দৰ্ভত প্ৰাসংগিক আন্তঃৰাষ্ট্ৰীয় নিয়ম ৷ আমাৰ ক্ষেত্ৰত আমি সমতা আৰোপ কৰিছিলো কাৰণ কানাডাই আমাৰ কাম-কাজত অহৰহ হস্তক্ষেপ কৰাৰ বিষয়ে আমাৰ উদ্বেগ আছিল ৷" ইতিমধ্যে কানাডাই ভাৰতৰ পৰা 41 জন কূটনীতিবিদক প্ৰত্যাহাৰ কৰিছে ৷
ভাৰতৰ পৰা কূটনীতিবিদসকলক ঘূৰি অহাৰ কথা ঘোষণা কৰি কানাডাৰ বৈদেশিক মন্ত্ৰী মেলানিয়া জলীয়ে বৃহস্পতিবাৰে নতুন দিল্লীৰ এই কাৰ্যক “আন্তঃৰাষ্ট্ৰীয় আইনৰ বিপৰীত” আৰু কূটনৈতিক সম্পৰ্কৰ ভিয়েনা সন্ধি উলংঘা কৰা বুলি অভিহিত কৰে ৷ ইতিমধ্যে ভাৰতে এই অভিযোগ নাকচ কৰিছে ৷ জয়শংকৰে কয় যে ভাৰত আৰু কানাডাৰ মাজৰ সম্পৰ্ক বৰ্তমান এক কঠিন পৰ্যায়ৰ মাজেৰে পাৰ হৈ আছে আৰু তেওঁ কয় যে কানাডাৰ ৰাজনীতিৰ কিছুমান অংশৰ সৈতে ভাৰতৰ সমস্যা আছে ৷
লগতে পঢ়ক : Cash for Questions Row : মহুৱা মৈত্ৰৰ নগদ ধন কেলেংকাৰীৰ বিতৰ্ক; কিয় আঁতৰি আছে তৃণমূল কংগ্ৰেছৰ নেতৃত্ব ?
