নিউজ ডেস্ক, ২ জুন : এদিন দুদিন বা এসপ্তাহ দুসপ্তাহ নহয়, সুদীৰ্ঘ ৩০২ দিন সন্দেহবশত কাৰাগাৰত বন্দী ! এই সুদীৰ্ঘ সময়ছোৱাত নিজকে নিৰ্দোষী প্ৰমাণ কৰাত ব্যৰ্থ হৈছিল এহাল দম্পতী । যাৰ বাবে আপোন ঘৰখন, পৰিয়াল-পৰিজনৰ পৰা দূৰৈত আঁতৰি থাকিবলগা হয় পশ্চিমবংগৰ এই দম্পতীটো । অৱশেষত যেনিবা সকাহ লাভ । কাৰাগাৰৰ পৰা মুক্ত হৈ নিজগৃহলৈ ওভতে অবৈধ অনুপ্ৰৱেশকাৰীৰ অভিযোগত অভিযুক্ত দম্পতীটো (WB couple imprisoned in illegal immigration) ।
পশ্চিমবংগৰ পূব বৰ্ধমানৰ জামালপুৰৰ বাসিন্দা ফালাশ আৰু শুক্লাই তেওঁলোকৰ ডেৰ বছৰীয়া সন্তানৰ সৈতে চাকৰিৰ সন্ধানত বেংগালুৰুলৈ গৈছিল । তেওঁলোকে চহৰখনত আৱৰ্জনা নিষ্কাশনৰ কামত নিযুক্ত হৈছিল । থাকিবলৈ লৈছিল মাৰাথল্লি অঞ্চলত । কিন্তু ২০২২ চনৰ জুলাই মাহত তেওঁলোকৰ জীৱনলৈ নামি আহে অমানিশা ।
সেই সময়ত কৰ্ণাটক আৰক্ষীয়ে ৰাজ্যখনত অবৈধ বাংলাদেশী অনুপ্ৰৱেশকাৰীৰ বিৰুদ্ধে অভিযান আৰম্ভ কৰে (Bengal couple imprisoned for illegal immigration) । আৰু সেই অভিযানতেই বিদেশী আইনৰ অধীনত দম্পতীটোক গ্ৰেপ্তাৰ কৰি ন্যায়িক জিম্মালৈ প্ৰেৰণ কৰে । অৱশ্যে দম্পতীটোৱে তেওঁলোক যে পশ্চিমবংগৰ জামালপুৰৰ বাসিন্দা সেয়া আৰক্ষীক বুজাবলৈ বাৰে বাৰে চেষ্টা কৰে । কিন্তু তাত বিফল হয় । ফলত কাৰাবন্দী হ'বলগা হয় ।
তাৰ পিছত, গ্ৰেপ্তাৰ কৰা দম্পতীটোৱে দিয়া ঠিকনালৈ গৈ আৰক্ষীয়ে তেওঁৰ ঠিকনা সঠিক হয়নে নহয় সেয়া পৰীক্ষা কৰে । লগতে বেংগালুৰু আৰক্ষীয়ে জামালপুৰৰ খণ্ড উন্নয়ন বিষয়াৰ সৈতে যোগাযোগ কৰে আৰু গ্ৰেপ্তাৰ হোৱা লোককেইজনৰ আত্মীয়সকলক লগ কৰে । এই সকলো তদন্ত সম্পূৰ্ণ কৰাৰ পিছত দম্পতীটোক ২৮ এপ্ৰিলত জামিন প্ৰদান কৰা হয় (WB couple granted bail in Bengali immigrants) । কিন্তু জামিনৰ সময়ত স্থানীয় ব্যক্তিসকলৰ স্বাক্ষৰৰ প্ৰয়োজন হোৱা বাবে তেওঁলোকৰ মুক্তিত কিছু বিলম্ব হয় । অৱশ্যে প্ৰয়োজনীয় সকলো আইনী প্ৰক্ৰিয়া সম্পূৰ্ণ হোৱাৰ পিছত অৱশেষত দম্পতীটোক বৃহস্পতিবাৰে তেওঁলোকৰ গৃহ চহৰলৈ প্ৰেৰণ কৰা হয় ।
লগতে পঢ়ক :Molestation with Minor in Bihar : বৈশালী জিলাত কিশোৰীক ৫ দুৰ্বৃত্তৰ দলবদ্ধ ধৰ্ষণ
