নেশ্যনেল ডেস্ক,৬ নৱেম্বৰ : দিল্লীত বায়ু প্ৰদূষণে ভয়ংকৰ ৰূপ ধাৰণ কৰিছে । যাক লৈ দিল্লী চৰকাৰ আৰু সাধাৰণ নাগৰিকসকলো চিন্তিত হৈ পৰিছে । যোৱা সপ্তাহত, প্ৰদূষণৰ বাবে চৰকাৰে দুদিনৰ বাবে বিদ্যালয় বন্ধ ৰাখিবলগীয়াও হৈছিল । আনহাতে চৰকাৰ তথা বিশেষজ্ঞসকলে বায়ু প্ৰদূষণ হ্ৰাস কৰিবলৈ প্ৰতিদিনে নতুন সমাধান বিচাৰি আছে । এনে সময়তে দিল্লী চৰকাৰে আইআইটি কানপুৰৰ সৈতে যোগাযোগ কৰিছে ।
সোমবাৰে পুৱা দিল্লীৰ মুখ্যমন্ত্ৰী কাৰ্যালয়ৰ একাংশ বিষয়াই আইআইটিৰ জ্যেষ্ঠ অধ্যাপক মনিন্দ্ৰ আগৰৱালাৰ সৈতে যোগাযোগ কৰে । অধ্যাপক মনিন্দ্ৰই কোৱা মতে দিল্লী চৰকাৰে দিল্লীত কৃত্ৰিম বৰষুণৰ চিন্তা কৰি আইআইটি কৰ্তৃপক্ষৰ কাষ চাপিছে । অধ্যাপকগৰাকীৰ মতে যেতিয়া এই সন্দৰ্ভত চৰকাৰৰ পৰা যিকোনো প্ৰস্তাৱ লাভ কৰিব তেওঁলোকে পৰৱৰ্তী ব্যৱস্থা গ্ৰহণ কৰিব ।
অধ্যাপক মনিন্দ্ৰই কোৱা মতে আইআইটি কানপুৰে কৃত্ৰিম বৰষুণৰ বাবে বহু বছৰ পূৰ্বে আমেৰিকাৰ পৰা চেচনা বিমানৰ অৰ্ডাৰ দিছিল । আইআইটি কানপুৰ কৃত্ৰিম বৰষুণ কৰিবলৈ সম্পূৰ্ণৰূপে প্ৰস্তুত । কেইমাহমান পূৰ্বে আইআইটি কানপুৰত সফলতাৰে কৃত্ৰিম বৰষুণৰ পৰীক্ষা কৰা হৈছিল । এতিয়া অসামৰিক বিমান পৰিবহণ সঞ্চালকালয়ৰ (ডিজিচিএ) পৰা যিকোনো স্থানত চেচনা বিমান পৰিচালনাৰ অনুমতিও পোৱা গৈছে । অধ্যাপক মনিন্দ্ৰৰ মতে তেওঁ কৃত্ৰিম বৰষুণৰ বাবে আইআইটি কানপুৰৰ বিশেষজ্ঞসকলৰ সৈতেও কথা পাতিব ।
আইআইটি কানপুৰৰ জ্যেষ্ঠ অধ্যাপক মনিন্দ্ৰই কোৱা মতে যদি কৃত্ৰিম বৰষুণ কৰা হয়, তেন্তে দিল্লীবাসী প্ৰায় এসপ্তাহৰ বাবে প্ৰদূষণৰ পৰা সকাহ পাব পাৰে । এক পৰিসংখ্যা অনুসৰি এবাৰ কৃত্ৰিম বৰষুণ দিবলৈ কেইবা লাখ টকা খৰচ হ'ব ।
লগতে পঢ়ক :Delhi Air Pollution : ডাঠ কুঁৱলীৰ আৱৰণত তাজমহল; দৰ্শনত ব্যৰ্থ পৰ্যটক
