নেশ্যনেল ডেস্ক, ১ এপ্ৰিল: দিল্লীৰ অতিৰিক্ত সত্ৰ ন্যায়াধীশৰ আদালতে স্থগিত কৰিলে দীপ সিদ্ধুৰ জামিন আবেদনৰ শুনানি । যোৱা ৩১ মাৰ্চত দীপ সিদ্ধুৰ জামিন আবেদনৰ শুনানি গ্ৰহণৰ দায়িত্ব দিয়া হৈছিল অতিৰিক্ত সত্ৰ ন্যায়াধীশ চাৰু আগৰৱালক । কিন্তু সময়সূচী সলনি হোৱাৰ বাবে অতিৰিক্ত সত্ৰ ন্যায়াধীশ সতীশ কুমাৰে বিষয়টো স্থগিত কৰে ।
ইয়াৰ পিছতে বিষয়টো অতিৰিক্ত সত্ৰ ন্যায়াধীশ নীলুফাৰ আবিদা পাৰবীনলৈ স্থানান্তৰ কৰা হয় যদিও তেওঁ আদালতত অনুপস্থিত থকা বাবে ন্যায়ধীশ এ এছ জে কুমাৰে অহা ৮ এপ্ৰিলত পৰৱৰ্তী শুনানিৰ দিন নিৰ্ধাৰণ কৰে । উল্লেখ্য যে, পূৰ্বে শুনানিৰ সময়ত অনুসন্ধানকাৰী বিষয়াই এই গোচৰৰ শুনানি অতিৰিক্ত সত্ৰ ন্যায়াধীশ চাৰু আগৰৱালাৰ আদালতলৈ প্ৰেৰণ কৰিবলৈ অনুৰোধ জনাইছিল ।
অনুসন্ধানকাৰী বিষয়াজনে যুক্তি দৰ্শাইছিল যে, গোচৰটোৰ সাতজন সহ-অভিযুক্তক অতিৰিক্ত সত্ৰ ন্যায়াধীশ চাৰু আগৰৱালাৰ আদালতে জামিন প্ৰদান কৰিছে । আন সহ-অভিযুক্তৰো অগ্ৰিম জামিন একেখন আদালততে স্থগিত হৈ আছে । ইয়াৰ পিছতে অতিৰিক্ত সত্ৰ ন্যায়াধীশ দীপক ডুবাছে কোন আদালতে জামিন আবেদনৰ শুনানি কৰিব সেই সিদ্ধান্ত ল'বলৈ বিষয়টো জিলা আৰু সত্ৰ ন্যায়াধীশ গিৰিশ কাঠপলিয়াৰ আদালতলৈ প্ৰেৰণ কৰে ।
তাৰ পিছত জিলা আৰু সত্ৰ ন্যায়াধীশ গিৰিশ কাঠপলিয়াই গোচৰটো অতিৰিক্ত সত্ৰ ন্যায়াধীশ চাৰু আগৰৱালাৰ আদালতলৈ স্থানান্তৰ কৰে । উল্লেখ্য যে, যোৱা ২৬ জানুৱাৰীত কৃষকৰ ট্ৰেক্টৰ ৰেলীৰ সময়ত লালকিল্লাত ধৰ্মীয় পতাকা উত্তোলনৰে জড়িত থকাৰ অভিযোগত যোৱা ৯ ফেব্ৰুৱাৰীত দীপ সিদ্ধুক গ্ৰেপ্তাৰ কৰা হৈছিল । যোৱা ২৬ ফেব্ৰুৱাৰীত আদালতে দীপ সিদ্ধুৰ জামিন আবেদন নাকচ কৰিছিল ।
যোৱা ২৩ ফেব্ৰুৱাৰীত আদালতে দীপ সিদ্ধুক ১৪ দিনৰ বাবে ন্যায়িক জিম্মালৈ প্ৰেৰণ কৰে । আৰক্ষীয়ে অভিযোগ তুলিছে যে, সিদ্ধুৱে ৰাজহুৱা সম্পত্তি ক্ষতিসাধন কৰি উত্তপ্ত পৰিস্থিতিৰ সৃষ্টি কৰিবলৈ জনসাধাৰণক প্ৰৰোচিত কৰিছিল । ট্ৰেক্টৰ ৰেলীৰ সময়ত নিয়ম উলংঘন কৰা হৈছিল ।
লালকিল্লাত ধৰ্মীয় পতাকা উত্তোলনৰ কৰা কাৰ্যতো দীপ সিদ্ধুৱে আগ-ভাগ লৈছিল বুলি আৰক্ষীয়ে জানিবলৈ দিছে । উদণ্ড লোকসকলে ১৪০ জন আৰক্ষী কৰ্মীক আক্ৰমণ কৰিছিল । দিল্লী আৰক্ষীয়ে কৈছিল যে, তেওঁলোকৰ লাভ কৰা ভিডিঅ'টোত স্পষ্টভাৱে দেখা গৈছে যে, দীপ সিদ্ধুয়ে ধৰ্মীয় পতাকা আৰু লাঠি লৈ লালকিল্লাত প্ৰৱেশ কৰিছে ।
