নিউজ ডেস্ক, ৫ ছেপ্টেম্বৰ : বৰ্তমান ইণ্ডিয়া বনাম ভাৰত বিতৰ্ক তুংগত আছে । শাসক-বিৰোধী উভয়ে উঠি-পৰি লাগিছে এই বিতৰ্কত । আনহাতে, চলিত এই বিতৰ্ক সন্দৰ্ভত দিল্লীৰ মুখ্যমন্ত্ৰী অৰবিন্দ কেজৰিৱালে কেন্দ্ৰৰ শাসনাধিষ্ঠিত বিজেপিক ভাৰত সন্দৰ্ভত প্ৰশ্ন কৰিছে । কেজৰিৱালৰ প্ৰশ্ন, যদি শেহতীয়াকৈ গঠন হোৱা বিৰোধী মিত্ৰজোঁট ইণ্ডিয়াই নিজৰ নাম ভাৰতলৈ সলনি কৰে তেন্তে ভৱিষ্যতে পুনৰ এবাৰ ভাৰত নাম সলনি কৰিব নেকি ? আনহাতে, ইণ্ডিয়া মিত্ৰজোঁটৰ অংশীদাৰ আপ নেতাগৰাকীয়ে দেশৰ নাম সন্দৰ্ভত কেন্দ্ৰীয় চৰকাৰে গ্ৰহণ কৰা পদক্ষেপত তীব্ৰ আপত্তি দৰ্শাইছে ।
যদি ইণ্ডিয়া মিত্ৰজোঁটে নিজৰ নাম ভাৰতলৈ সলনি কৰে, তেন্তে বিজেপিয়ে 'ভাৰত'ৰ সলনি আন কিবা নাম ল'ব নেকি ? অৰবিন্দ কেজৰিৱালে প্ৰশ্ন কৰে । তেওঁ তামিলনাডুৰ মন্ত্ৰী উদয়ানিধিৰ মন্তব্যৰ পৰা সৃষ্টি হোৱা ৰাজনৈতিক ধুমুহাৰো প্ৰতিক্ৰিয়া ব্যক্ত কৰে । কেজৰিৱালে এই সন্দৰ্ভত কেৱল কয় যে সকলোৱে ইজনে সিজনৰ ধৰ্মক সন্মান কৰা উচিত আৰু আনৰ বিশ্বাসৰ বিৰুদ্ধে কথা নক'ব লাগে ।
"ময়ো সনাতন ধৰ্মৰ অন্তৰ্ভুক্ত । আমি ইজনে সিজনৰ ধৰ্মক সন্মান কৰা উচিত, আনৰ বিশ্বাসৰ বিৰুদ্ধে কথা কোৱাটো ভুল ।" দিল্লীৰ মুখ্যমন্ত্ৰী কেজৰিৱালে কয় ।
আনহাতে, চৰকাৰৰ সূত্ৰই পূৰ্বতে ইটিভি ভাৰতৰ আগত প্ৰকাশ কৰিছিল যে ইণ্ডিয়াক ভাৰত নাম দিয়াৰ বাবে সংসদৰ ১৮ ছেপ্টেম্বৰৰ বিশেষ অধিবেশনত এটা প্ৰস্তাৱ অনাৰ বাবে সৰ্বোচ্চ অগ্ৰাধিকাৰ আছে । ইফালে ইণ্ডিয়া ব্লকৰ আন এগৰাকী নেতা তথা পশ্চিমবংগৰ মুখ্যমন্ত্ৰী মমতা বেনাৰ্জীয়ে কয় যে আমি সকলোৱে জানো যে দেশৰ নাম ভাৰত । কিন্তু বাহিৰৰ বিশ্বই আমাক কেৱল ইণ্ডিয়া বুলিহে জানে ।
লগতে পঢ়ক :India vs Bharat Row : বিশ্বই আমাক ইণ্ডিয়া বুলিয়ে জানে; কেন্দ্ৰৰ ভাৰত পদক্ষেপক মমতাৰ উপহাস
