নেশ্য়নেল ডেস্ক, ৬ জানুৱাৰী : দেশজুৰি ক'ভিড-১৯ ভাইৰাছৰ টীকাকৰণৰ অনুশীলন অব্য়াহত । চৰকাৰৰ সেউজ সংকেতৰ লগতে ভাৰতীয় কোম্পানী এছআইআই আৰু ভাৰত বায়'টেকৰ প্ৰতিষেধক প্ৰস্তুতৰ কাম ইতিমধ্য়ে প্ৰায় সম্পূৰ্ণ হোৱাৰ পথত । যৌথভাৱে প্ৰস্তুতকৰণ অব্য়াহত থকা কোম্পানী দুটাই প্ৰতিষেধকৰ উৎপাদন, সম্প্ৰসাৰণ আৰু সৰবৰাহৰ লক্ষ্য়ৰে কাম কৰাৰ বিশেষ বাৰ্তা দেশৰ লগতে বিশ্ববাসীক প্ৰেৰণ কৰিছে । কিন্তু ইয়াৰ মাজতে ক'ভিড-১৯ৰ টীকাকৰণ অভিযান আৰু প্ৰতিষেধক প্ৰস্তুতকলৈ পুনৰ বিৰোধী দল কংগ্ৰেছৰ কটাক্ষ বিজেপি চৰকাৰক । জ্য়েষ্ঠ কংগ্ৰেছ নেতা তথা সাংসদ মনীষ তিৱাৰীয়ে প্ৰতিষেধকৰ নিৰ্ভৰযোগ্য়তাৰ ওপৰত প্ৰশ্ন তুলি কয় যে, বিজেপি দলে কৰ'ণা মহামাৰীৰ এই পৰিস্থিতিক ৰাজনৈতিকভাৱে অপব্য়ৱহাৰ কৰিছে ।
তেওঁৰ অভিযোগ বিজেপি চৰকাৰে কেৱল অনুসন্ধান আৰু বিকাশৰ নামত কেইবা কোটি টকা খৰছ কৰা কোম্পানীৰ বাবেহে মহান কাম কৰিছে । লগতে তেওঁৰ অভিযোগ যে কোম্পানীটোৱে আত্মনিৰ্ভৰ ভাৰতক সফল ৰূপ দিবৰ বাবে প্ৰতিষেধক প্ৰস্তুতৰ অনুজ্ঞাপত্ৰ লৈছে যাৰ তৃতীয় পৰ্যায়ৰ পৰীক্ষণ এতিয়ালৈ সম্পূৰ্ণ হোৱা নাই ।
